Assi: Nils Baum/Bureau for Inatsisartut

Inatsisartut ataatsimiittarfissaat nutaaq ataatsimiititalimi suliarineqassaaq

Inatsisartut nutaamik ataatsimiittarfittaarnissaat tallimanngornermi aalajangiinigineqanngilaq. Taamaattorli Siumut aamma Inuit Ataqatigiit amerlanerussuteqarlutik siunnersuut ataatsimiititaliami suliassanngorlugu ingerlateqqippaat. Partiit sinneri akerliupput.

Inatsisartut ataatsimiittarfissaannik, allaffissornikkut sullissiviit ilanngullugit, nutaamik sananissamik 2013-imi novembarimi tunngaviusumik isummernerup Inatsisartunit ilalerneqarnissaanik Inatsisartut aalajangiiffigisassaattut siunnersuut Siumumit Inuit Ataqatigiinnillu ilalerneqarpoq aningaasaqarnermut akileraartarnermullu ataatsimiititaliamullu ingerlateqqinneqartussanngorluni. Partiit sinneri akerliupput. 

Siunnersuummut naaggaarnissamut pissutissaqanngilaq, tassami akuerinissaanut itigartinnissaanulluunniit tunngavissaqanngimmat, Inuit Ataqatigiit sinnerlugu Aqqaluaq B. Egede taam oqariartuuteqarpoq. Taamaamma partiip suliaq ataatsimiititaliamut ingerlateqqippaa. 

-Inatsisartut ataatsimiittarfissaanik nutaamik sanatitsinissaq Inuiaqatigiinnut iluanaarutissartaqarnersoq imaluunniit aserfallatsaaliiuarneq imminut akilersinnaanersoq misissoqqaartariaqarparput, Aqqaluaq B. Egede Inatsisartut ataatsimiittarfiani taama oqariartuuteqarpoq. 

Siumumi suliap aningaasaqarnermut akileraartarnermullu ataatsimiititaliamut ingerlateqqinnissaa aamma qularutigineqanngilaq. 
- Silaannalunnera qiianartarneralu pissutaallutik suliassat angerlarsimaffimmi suliarisariaqartarpagut. Tamannalu allanut atoqqunanngeqaaq, Jens emmanuelsen Siumut sinnerlugu aqariartuuteqarpoq.

Siumut aamma Inuit Ataqatigiit aamma oqariartuutigaat Inatsisartut illorsuat tassaasariaqartoq avammut nittarsaannermi tulluusimaarutigalugu pigisassaq. Tassamigooq illorsuaq nutaaq kalaallik eqqumiitsuliortuisa sanaluttartuisalu suliaannik saqqummersitsiviusinnaanissaa aamma eqqartorneqartariaqarpoq taamaaliornikkut takornarissanut Nunatsinneersunik soqutiginartunik takusassarsinnaammat. 

Partiit pingasut itigartitsinissamut naammanngitsut 

Demokraatit, Atassut aamma Partii Naleraq siunnersuummut akerliupput, tamannali siunnersuummik itigartitsinissamut naammanngilaq. 

Taakku partiit pingasut inuiaqatigiinni ajornartorsiutit salliutinneqarnissaa kissaatigaat. 

- Piffissami meeqqat atuarfii pitsaasut qularnaarniarlugit ajornartorsiorfitsinni, inunnik isumaginninnerup iluani nunami maani meeqqat inuusuttullu ikiorneqarnissaminnut pisariaqartitsileruttorfianni, innuttaasut annertuumik ikiorneqarnissaminnut pisariaqartitsiffianni, taava uangut politkerit illersorsinnaanngilarput taamattumik annertoorsuarmik ataqqinaatissatut sanatitsiniarneq. Naameerluinnaqqeqqissaarparput. Demokraatit sinnerlugit Tillie Martinussen oqarpoq. 

Aamma atuaruk Tillie: Inatsisartut ataatsimiittarfiat 300 millionilik sussagatsigu?

Partii Naleqqamit oqariartuut aamma taamatukanneq nipeqarpoq. 
Taakku isumaqarput Nunatsinni inuppassuit ilaqutariippassuillu ineqarniarnikkut taama annertutigisunik ajornartorsiuteqartillugit nutaarsuarmik allaffeqarfiliuullutalu ataatsimiittarfissuarmik sanatitsiniarneq naapertuussorinngilarput.

Atassutip inuussutissarsiornikkut siuarsaaneq aallukkusunneruaa.
Partii isumaqarpoq, Nunatta ullumi siunissamilu aningaasaqarniarnera taama isikkoqartillugu pisortat aningaasaataa pingaarnersiuinikkut atorluarneqartariaqartut, inuussutissarsiuteqartunullu atugassarititaasut pitsaanerusunik sinaakkusersornissaat kissaatigalugu. 

Siunnersuut novembarip arfineq-aappaani Inatsisartuni aappassaaneerneqassaaq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat