Inatsisartunut sassartup suiaaqatiminoortut pillugit oqaaserisaanut LBGT akissuteqartoq
Mads Peter Grønvold isumaqarpoq tamanna Biibilip oqariartuutaanut naapertuutinngitsoq, inatsisartunut qinigassanngortittoq aviisimi Sermitsiaq.Ag-mi apersorneqarluni taama oqarpoq.
- Kristumiutut inuunitsinni malitassarput tassa Biibili, uagut Inatsisartunut qineqqusaartugut aamma Inatsisartuni ilaasortat Biibilimi allassimasut allanngortissinnaanngikkigut isumaqarpunga, Mads Peter Grønvold aviisimi Sermitsiaq.Ag-mi taama issuarneqarpoq.
Nuna tamakkerlugu peqatigiiffiup, suiaateqatiminnik ilaqartartut peqatigiiffiani LGBT Qaamanermi siulittaasoq Tina Egede , Mads Peter Grønvold akissuteqarfigalugu tusagassiuutinut nalunaaruteqarluni ataasinngornermi ilaatigut ima allappoq:
- Upperisaq suiaassuseq ammip qalipaataa atoqatigiinnikkullu soqutigisat apeqqutaatinnagit kikkut tamarmik imminnut ataqqisariaqarput.
Hans Peter Grønvoldillu oqaaseqaataanut akissuteqarluni Tina Egede ima allappoq:
- Oqaluffimmi katissinnaasariaqarpugut, suiaaqatigiimmi kristumiutut upperisaqarsinnaapput, asanninnertillu nalliuttorsiutiginiarlugu guutip saavani imminnut angeqatigiinnissaminnut kissaateqarlutik. Meeravissiartaarnissamut periarfissaqartariaqarpugut, aappariit kikkulluunniit asanninneq aqqutigalugu ilaqutariinnik pilersitsisinnaammata, Tina Egede oqarpoq.
