Inatsisartunut qinersinermi allakkatigut qinersisinnaanngorputit
![](/sites/default/files/styles/image_934x467/public/article_images/brevstemme.png?itok=9BtV8l_g)
Kalaallit nunatta avataaniikkallartut imaluunniit ullormi qinersiffiusumi aallaqqasut qinersisinnaanissaat taamaaliornikkut qulakkeerneqassaaq.
Allakkatigulli qinersissagaanni eqqumaffigisassaqarpoq: Nunatsinni qinersisinnaatitaassagaanni, nuunnermit ukiuni kingullerni marlunni nunatsinni inuit allattorsimaffianni nalunaarsugaasimasariaqarpoq.
Taamaammat Aningaasaqarnermut nunami namminermullu naalakkersuisoqarfiup, pingaartumik kalaallit Danmarkimi nunanilu allani ilinniagaqartut, kajumissaarpai Nunatsinni kommunerisaminni qinersisartut allattorsimaffianni nalunaarsorneqarsimanerlutik misissoqqullugu.
Nalunaarsugaanngikkaannilu, qinersisinnaatitaajumalluni qinersisartut allattorsimaffiannut allatsinnissaminik qinnuteqaateqartoqassaaq.
Qinnuteqaallu taanna qinersineq sapaatit-akunnerinik pingasunik sioqqullugu - tassalu kingusinnerpaamik novembarip arfineq-aappaani - akuerineqareersimassaaq.
Qinigassanngortittut allattorsimaffiat inaarutaasoq ullorlu taannarpiaq aamma saqqummiunneqartussaavoq.
Danmarkimi kommunit innuttaasunik sullissiviisa allaffiini Københavnimilu Nunatta sinniisoqarfiani allakkatigut qinersisoqarsinnaavoq.
Nunatsinni allakkat ingerlaartarneri eqqarsaatigalugit, sapinngisamik siusissukkut allakkatigut qinersisoqarnissaa aamma kaammattuutigineqarpoq.