Inatsisartunut ilaasortap Inuit Nunaat nunatsinnut taaguutinngortikkusukkaa

Nikolaj Jeremiassen Siumut apeqquteqaat aallavigalugu oqallinnissamik siunnersuuteqarpoq, nunatta taaguutaa " Kalaallit Nunaat" Inuit Nunaat"-nik taarserneqassanersoq.

- Naalakkersuisoqarfik apeqquteqaatip taassuma suliarineranut atatillugu Oqaasileriffimmut nassiuppaa, paasiniarlugu Kalaallit Nunaanni Nunap Aqqinik Aalajangiisartunit nunap taaguutaa suliarineqarsimanersoq,  Ilinniartitaanermut ilageeqarnermut ilimatusarnermullu Naalakkersuisoq Nivi Olsen Demokraatit, Nikolaj Jeremiassenimut akissuteqarluni taama allappoq.

Aamma atuaruk Nunatta taaguutaata allanngortinnissaa Naalakkersuisut pilersaarutiginngilaat

Nivi Olsenip erseqqissaatigaa oqallinnermi misigissutsit annertuumik ilaatinneqartarmata apeqqut assigiinngitsunik isumaqarfigineqarsinnaalluni.

Nivi Olsenip aammaarluni erseqqissaatigaa Kalaallit Nunaanni innuttaasut nunap taaguutaanik Inuit Nunaannut allanngortillugu aalajangiissagaluarpata, Kalaallit Nunaanni innuttaasut taaguummik taassuminnga kisermaassisuunissartik naatsorsuutigisinnaanngikkaat.

Aamma atuaruk Inatsisartunut ilaasortap Inuit Nunaat nunatsinnut taaguutinngortikkusukkaa

- Nunatta taaguutaata allanngortinnissaanut apeqqut maannakkut isummerfigineqartariaqanngitsoq, Nivi Olsen isumaqarpoq.

- Pineqartoq siunissami tunngaviusumik inatsisiliornissamik ataatsimiititaliap qaqilersinnaassagaa, kommissionimik taamaattumik pilersitsisoqarnissaanik aalajangertoqassappat, Nivi Olsen siunnersuuteqartumut akissuteqarluni taama allappoq.