Inatsisartuni ullumi pilersaarutit

Inatsisartut ullumi ataatsimiinerat ullup qeqqata siorna aqqanermut aallartippat, inuussutissarsiornermut, suliffeqarnermut, niuernermut nunanullu allanut naalakkersuisoq, Vittus Qujaukitsoq Inatsisartunut ilaasortanit apeqqarissaarfigineqassaaq.

Inatsisartullu ataatsimiinnerat nalunaaqutaq ataatsimut aallartippat, Vittus Qujaukitsup siunnersuutaa tassalu Kalaallit Nunaannut suliffissarsiortut killilersimaarneqarnissaat pillugu inatsisissatut allannguut oqallisigineqassaaq.

Tassani pineqarluni, sulisitsisut sulisussanik qinnuteqaqqusinerminni, Naalakkersuisut pilersitaannut suliffissarsiuussinermi tamanit atorneqartussamut nittartakkamut pinngitsooratik ikkussisarnissaat. Siunnersuummi pineqarluni nunanit allamiunik sulisussarsiunnginnermi nunaqavissunik sulisussarsiortarnissaq.

Oqaluuserisassat aapparissavaa, ilinniartitaanermut, kulturimut, ilisimatusarnermut ilageeqarnermullu naalakkersuisup siunnersuutaa.

Taanna eqqumiitsuliornermik ingerlatsinermi inatsisissatut allannguutitut siunnersuuteqassalluni. Tamanna eqqumiitsuliornermut tunngasut nukittorsarnissaat pillugu siunnersuutaavoq, tamatumunngalu ilanngullugit eqqumiitsuliortut atugarisaat aamma innuttaasut eqqumiitsuliornermik ingerlatsinermit tamatigoortumik neqeroorutinik iluaqutissarsisinnaanissaat anguniarneqarluni.

Oqaluuserineqartussatut kingullertut sammineqassaaq aningaasaqarnermut naalakkersuisup, Andreas Uldumip siunnersuutaa, tassaasoq isertitat pillugit akileraartarnerup allannguutissaa.

Tassani eqqarsaatigineqarluni, aningaaseriviit taarsigassarsiniartarfiillu akiligassaasa annaaneqarneranni taakku suliffeqarfiit akileraarutaasigut ilanngaatigineqartarnissannut tunngasoq.