Inatsisartuni ullormut pisussat
Immikkoortoq siulleq tassaavoq Atassummeersup Steen Lyngep Namminersorlutik Oqartussat kommunillu ilaqutariinnut illuutaasa attartortittakkat attartortunit tuniniaanermi akigitinneqartut naapertorlugit pisiarineqarsinnaalersinnissaannik siunnersuutaata aappassaaneerneqarnera.
Ullumikkutut itsillugu, inissiat attartortittakkat ilaqutariinnullu illut attartortittakkat pilerineqaqisut immikkoortinneqanngillat, aamma akinik aalajangersaanerup ammasumik pinissaa siunnersuummi qulakkeerniarneqarpoq.
Sanaartornermut ataatsimiititaliap isumaqatigiissup ilaatigut erseqqissaassuteqarluni siunnersuutip pingajussaaneerneqarnissaa inassutigaa.
Ullormut oqaluuserisassani immikkoortup tullia tassaavoq Inuit Ataqatigiinneersup Aqqaluaq B. Egedep namminersorneq pillugu inatsit tunngavigalugu isumaqatigiissutaasut oqartussaaffiit akisussaaffiillu Nunatsinnut nuunneqartussat pillugit 2017-imi ukiaanerani ataatsimiinnermi Naalakkersuisut ersarissaanissaannik siunnersuutaa.
Inatsisartut 2015-imi siunnersuummik assingusumik akuersissuteqarsimanerat pissutigalugu siunnersuut Naalakkersuisunit itigartinneqartussatut inassutigineqarpoq. Ersarissaaneq taanna 2018-imi upernaakkut ataatsimiinnermi saqqummiunneqartussaavoq, piffissaliussallu taassuma malinneqarnissaa Naalakkersuisut siulittaasuata aalajangiusimaannarniarpaa.
Siunnersuutit pingajuat, Inuit Ataqatigiinneersup Sara Olsvigip siunnersuutaa, Naalakkersuisut aamma itigartippaat.
Taassuma Issittoq pillugu periusissiamik 2017-imi ukiaanerani ataatsimiinnermi saqqummiussisoqarnissaa siunnersuutigaa.
Pisariaqartinneqarnera Naalakkersuisut isumaqataaffigaat, Issittorli pillugu periusissaq 2020-p tungaanut atuuttoq Danmark peqatigalugu suliarineqartoq erseqqissaatigaat. Taamaammat periusissiamik nutaamik Nunatta siunissamut kissaatigisai tunngavigalugit ukiuni tullerni suliaqartoqassaaq.
Ullormut oqaluuserisassani immikkoortoq kingulleq tassaavoq Qaasuitsup Kommuniata avinneqarnissaanik siunnersuut oqallisaaqisoq.
Kommuninut qinersinerup tullianut 2017-imi apriilip sisamaani ingerlanneqartussami ikaarsaariarnermi ataatsimiititaliat marluk Qaasuitsup Kommuniani qinerneqassasut Naalakkersuisut siunnersuutigaat, taakkulu kommunip avinneqarnissaanik, 2018-imi januaarip aallaqqaataani pisussatut pilersaarutigineqartumik piareersaateqassapput.
Siunnersuummut oqaasertaliunneqartuni atuarneqarsinnaavoq kommunip avinneqarneranut aningaasartuutinik kommunip nammineerluni akiliuteqarnissaa tusarniaavigineqartunit tamanit erseqqissaatigineqartoq. Aningaasartuutissalli suli inaarutaasumik naatsorsorneqarsimanngimmata tamanna maannakkut inaarutaasumik aalajangiiffigineqarsinnaanngikkallarpoq.
