Inatsisartuni ullormut pisussat
Tarnimikkut nappaatilinnik kiffaanngissusiiaaneq allatigullu pinngitsaaliissummik iliuuseqarneq pillugu Inatsisartut inatsisaat naammassillugu pingajussaaneerneqassaaq. Siunnersuummi ilaatigut pinngitsaaliissummik katsorsagaanermut atatillugu napparsimasut naammagittaalliuuteqarnissaminnut periarfissaasa pitsanngorsarneqarnissaat pineqarpoq.
Naalakkersuisut nuna tamakkerlugu suliffinnut nittartakkamik pilersitsinissamik siunnersuutaat assortuussutaasoq aamma naammassillugu pingajussaaneerneqassaaq. Sulisitsisut ajornannginnerusumik sulisussarsiorsinnaanissaat tamatumani siunertaavoq.
Inatsisartut ullormut oqaluuserisassaanni immikkoortut pingajuattut, Nunatta inuiattut timersornikkut unammersuartarfissaanik qulisamik "National stadion"-imik pilersitsinissaq siunertaralugu Naalakkersuisut pilersaarummik suliaqaqqullugit peqquneqarnissaanik Inatsisartut aalajangiiffigisassaattut siunnersuut oqaluuserineqassaaq. Anders Olsenip Siumumeersup unammersuartarfissap ingerlanneqarnerani sanaartornissamilu aningaasatigut pissutsit atuuttussat pillugit misissuinissamik kingusinnerpaamik 2016-imi ukiakkut ataatsimiinnermi saqqummiunneqartussamik siunnersuuteqartuuvoq.
Hans Enoksenip Partii Naleqqameersup siunnersuutigaa aalisariutinik isaterinissamut tapiissutinik akiliuteqarnermi aalisarsinnaanermut akuersissutit siunissami atorunnaarsinnissaat periarfissaajunnaassasoq. Taanna isumaqapoq aalisartorpassuit aalisariutimik nutarternissaannik kissaateqarnerminni inuussutissarsiorsinnaajunnaarsinneqartartut.
Kiisalu Justus Hansen Demokraatineersoq Naalakkersuisut danskit naalagaaffiannik kiisalu danskit soraarnerussutisiaqalernissamut aningaasaateqarfiinik Kalaallit Nunaannut aningaasaliisarfimmik aningaasaateqarfiliortoqarnissaa Namminersorlutik Oqartussanut soqutiginaateqarnera pillugu apeqquteqaat aallaavigalugu oqallinnissamik siunnersuuteqarpoq. Aningaasaateqarfimmik taama ittumik pilersitsinikkut Nunatsinni aatsitassarsiornerup, takornariartitsinerup, aalisarnerup pisariaqartunillu attaveqaasersiunikkut inuussutissarsiutitigut ingerlatsinissamut nunat allamiut aningaasalersuinissaat pilerinarsarniarneqarpoq.
