Inatsisartuni ullormut pisussat
Naalagaaffiit Peqatigiit meeqqat pillugit isumaqatigiissutaata ilanngunneqarnissaa pillugu kingusinnerpaamik 2016-imi ukiakkut ataatsimiinnermi Inatsisartut inatsisisaattut siunnersuuteqaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuuteqarpoq.
Isumaqatigiissummi pisinnaatitaaffiit aalajangersarneqartut Nunatsinni inatsisiliornermut ilanngunneqarnissaat siunnersuuteqarnikkut qulakkeerniarneqarpoq.
Aaja Chemnitz Larsen aamma piitsuussutsip killinganik kingusinnerpaamik 2016-imi upernaakkut ataatsimiinnermut atatillugu aalajangersaaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuuteqarpoq. Piitsuussutsip killinganik aalajangersaanerup siunertarissavaa ilaqutariit meerartallit immikkut ukkataralugit aningaasatigut naligiinnginnerup piitsuussutsillu akiorneqarneranut tunngavissiinissaq.
IA-meersup tamatumunnga uiggiullugu aamma siunnersuutigaa Inatsisartut Nunatsinni aningaasarsiornikkut naligiinnginnerup akiorniarneqarnissaanut iliuusissatut pilersaarummik suliaqarlutik maanna aallarteriissasut, iliuusissatullu pilersaarut kingusinnerpaamik aappaagu ukiakkut ataatsimiinnermut atatillugu naammassineqareersimassasoq.
Kiisalu Inatsisartut ullormut oqaluuserisassaasa ilagaat IA-meersup Naaja Nathanielsenip siunnersuutaa, tassalu Naalakkersuisut neqeroortitsinermi atorneqartartussamik inatsisissatut siunnersuummik saqqummiussinissamut pisussaaffilerneqarnissaannik Inatsisartut aalajangiussassaattut siunnersuut aammalu neqerooruteqartoqartillugu maalaaruteqarfiusinnaasumik pilersitsisoqarnissaa.
