Inatsisartuni ullormut pisussat
Tamanna pereerpat qimminut nerukkaatissat oqaluuserineqassapput.
Inuit Ataqatigiinneersup Peter Olsenip aamma Partii Naleqqameersup Anthon Frederiksenip Naalakkersuisut kajumissaarpaat nunatta pissarititaanik qimminut nerukkaatissiorfiliornissamut periarfissanik misissueqqullugit.
Siunnersuut ataatsimiititaliami sukumiisumik suliarineqareersoq, Inatsisartut aappaagu upernaakkut ataatsimiinnissaannut Naalakkersuisut qimminut nerukkaatissiorfimmik pilersitsinissamut periarfissat pillugit nassuiaammik saqqummiussinissaat inassutigineqarpoq.
Tulliullugu Demokraatineersup Michael Rosingip siunnersuutaa oqaluuserineqassaaq, taassuma Innuttaasut immikkut tamarmik kiassarnermut atukkaminnik taamaallaat akiliisaleqqullugit, Nukissiorfinnit kiassarneqartut tamarmik immikkut uuttuutilersorneqarnissaat siunnersuutigaa.
Siunnersuutigineqartoq ataatsimiititaliami ilaasortanit tamanit ilalerneqarpoq, Naalakkersuisullu peqquneqarput periarfissat pillugit misissuinermik kingusinnerpaamik januaarip aallaqqaataani 2017-imi saqqummiusseqqullugit.
Michael Rosingip aamma siunnersuutigaa kinaassutsimut uppernarsaammik nuna tamakkerlugu atuuttussamik eqqussisoqassasoq, siunnersuullu taanna ilalerneqarpoq, inaarutaasumilli akuersissutigineqannginnerani apeqqutit arlallit qulaajarneqaqqaassapput.
Aamma tarnip pissusaanik ilisimasalittut taaguutip illersugaalernissaa pisissanngorunarpoq, taamaaliornikkut kinaluunniit imminut tarnip pissusaanik ilisimasalittut sulisinnaajunnaarsillugu. Steen Lyngep siunnersuutaa partiinit tamanit taperserneqarpoq.
Aammattaaq Inuit Ataqatigiinneersup Mimi Karlsenip siunnersuutaa siullermeerneqassaaq, taanna Københavnimi Kalaallit Peqqissartut Illuani ukiuni arlaqartuni nappaatertik peqqutigalugu najugaqartariaqartunut inissialiornissanik Naalakkersuisut misissuinissamik suliaqaqqullugit peqquneqarnissaannik siunnersuuteqarpoq.
Siunnersuuteqarnermi siunertarineqartut Naalakkersuisut paasilluarsinnaanerarpaat, sivisuumillu napparsimasut immikkut inissiaqartinnissaannut periarfissanik misissuerusullutik. Inissialli attartugaassapput, nutaanik inissialiortoqassappat Danmarkimi Kalaallit Peqqissartut Illuannut aningaasaliissutaasartut amerlineqartariaqassammata.
Kingullertullu Siumumeersup Vivian Motzfeldtip aalajangiiffigisassatut siunnersuutaa oqaluuserineqassaaq. Pisortani suliffeqarfinnilu pisortat pigisaanni atorfinitsitsisarnermi oqaatsitsinnik ilisimasaqarnissap pingaarnerutinneqarnissaa taassuma siunnersuutigaa.
Taanna ilaatigut isumaqarpoq oqaatsitta pingaarnerutinneqannginnerat pissutigalugu, nunatsinni innuttaasut inuttut nalikinnerusutut misigisartut, allanullu naleqqiullutik inorsartutut inissisimallutik inuiaat piorsarsimasut inuunerannut naapertuunnatik.
Vivian Motzfeldtip siunnersuutaa siullermeerneqassaaq.
