Urani Inatsisartuni ullumikkut aamma oqallisigineqassaaq
Urani pillugu oqallinneq ippassaq aallartippoq, Atassummeersup Steen Lyngep uranimut tunngatillugu 0,05 procentimut qummut killiliinissaq pillugu innuttaasunik taasititsisoqarnissaanik siunnersuuteqarmat.
Siunnersuulli partiinit tamanit itigartinneqarpoq - uranisiornissamullu angertoqassanersoq naaggaartoqassanersorluunniit innuttaasunit taasissutigineqarnissaanik siunnersuut ullumikkut oqaluuserineqassaaq.
Tamanna pereerpat qimaasunut tunngassuteqartoq oqaluuserineqassaaq.
Attaviitsup Naaja Nathanielsenip nuna allamiunut tunngasut Nunatsinnit tiguniarnerannik suliami ingerlanneqartumi qimaasunik aalajangersimasumik amerlassusilinnik tigusisinnaanermut periarfissap ilanngunneqarnissaanik Naalakkersuisut peqquneqarnissaannik Inatsisartut aalajangiiffigisassaattut siunnersuutaa oqaluuserineqassaaq.
Naaja Nathanielsenip oqallinnissap attortinnarsinnaanera, aammalu qinikkat innuttaasullu akornanni nunatsinnut qimaasunik tikisitsinissanut akerliusoqarnera ilisimanerarpaa. Oqallisiginissaali pingaartuuvoq, Naaja Nathanielsen erseqqissaavoq.
Vittus Qujaukitsup siunnersuutip tunngavilersorneqarnera nersortariaqartoq oqaatigaa.
- Europami qimaasut kialluunniit tusagassiuutitigut takuinnarlugit sunnertinngitsoorsinnaasanngilaq eqqarsarnanngitsoorsinnaananilu: ”Ikiuussinnaanerpugut?”, nunanut allanut naalakkersuisoq taama allappoq.
Taamaakkaluartorli siunnersuutip itigartitsissutigineqarnissaa inassutigaa, nunanut allanut susassaqarfiup nunatsinnut nuunneqarnissaa pillugu Danmarkimik isumaqatigiinniarnernut aporaattoorfiunera pissutigalugu.
Ullumi sisamanngornermi ullormut oqaluuserisassani immikkoortut kingulliit marluk aalisarnermut aammalu ujaqqanut pinnersaasiassanut tunngassuteqarput.
Siumumeersup Nikolaj Jeremiassenip siunnersuutigaa aalisarneq pillugu Inatsisartut inatsisaat allanngortinneqassasoq, Nunatta kitaani raajanut TAC-ip agguaanneqarnerani sinerissap qanittuani aalisartunut avataasiortunullu assigiimmik 50/50-ngortillugu.
Siunnersuutip itigartitsissutigineqarnissaa Naalakkersuisut inassutigaat.
Kingulliullugulu oqaluuserineqartussaq ujaqqanut pinnersaasiassanut tunngavoq. Partii Naleqqameersup Anthon Frederiksenip siunnersuutigaa Nunatsinni ujaqqanik pinnersaasiassanik aatsitassanillu katersisinnaanermut kiisalu annikitsumik aatsitassarsiorluni ujaqqanik piiaanissamut akuersissummik tunniussinissamut inatsisitigut immikkut aalajangersaasoqassasoq.
Vittus Qujaukitsup siunnersuutigineqartoq itigartitsissutigineqassasoq inassutigaa, annikitsumik aatsitassarsiornermut malittarissat Naalakkersuisunit maanna misissorneqaleruttormata aammalu tamanna pillugu inatsisissatut siunnersuummik 2017-imi upernaakkut ataatsimiinnermi saqqummiussisoqartussaammat.
