Inatsisartuni ullormut pisussat
KNR-imi oqaluttuareriikkatsitut, soraarnerussutisiaqarnissamut akiliutit tigunerini akileraarutiginagit akiliutiginerini akileraarutigineqartalernissaat Naalakkersuisut kissaatigaat.
Akileraarutigineqartarnerisa siuartinneqarneratigut nunatta karsiata isertitaqarnerulernissaa qulakkeerneqassaaq. Innuttaasut ilarpassuisa soraarnerussutisiaqarnissamut aaqqissuussinernut nunani allaniittunut akileraartarnerat tamatumunnga pissutaavoq.
Innuttaasummi ilarpassui nunanut allanut, pingaartumik Danmarkimut, nuuttarput. Danmarkillu taamaalilluni aningaasat Nunatsinni katersat akileraarutitigut iluanaaruteqarfigisarpai. Tamannalu Naalakkersuisut siunnersuuteqarnermikkut unitsikkusuppaat.
Ullormulli oqaluuserisassani immikkoortuni siullertut, inunngortunik toqusunillu nalunaaruteqartarneq, ilisinerit iliveqarfiillu pillugit Inatsisartut inatsisaata nutarterneqarnissaanik siunnersuut oqaluuserineqaqqaassaaq.
Inatsit maanna atuuttoq 1990-imeersuuvoq, ilaatigullu Nunatsinni toqusut timaannik ikuallaasarfinnik siunissami pilersitsisoqassagaluarpat tamatumunnga malittarisassat siunnersuummi aalajangersarneqassapput.