Inatsisartuni ullormut pisussat
![](/sites/default/files/styles/image_934x467/public/article_images/inatsisartut_foto_nils_baum_110315_0.jpg?itok=GAE_1Kj3)
Oqaluuserisassaq ataasiinnaavoq, kisiannili pingaaruteqarluinnarluni. Aappaagumummi aningaasanut inatsisissaq ullumi pingajussaaneerneqassaaq.
Naalakkersuisoqatigiit partiit pingasut isumaqatigiissusioreerput. Kisiannili amerlanerit isumaqataanissaat suli periarfissaavoq.
Partii Naleraq aningaasanut inatsisissaq pillugu isumaqatiginninniarneq aallartiinnartorli isumaqatiginninniarunnaarpoq, Inuit Ataqatigiilli naapeqatigiinnissamut qanittuaraapput piareersimallutillu. Illuatungeriilli suli arlaannaalluunniit tunuaannarusunngilaq, naapeqatigiinnissamullu periarfissiissallutik.
Inuit Ataqatigiit isumaqatigiinniarnissami allannguutissanik siunnersuutinik saqqummiussivoq. Ilaatigut tusagassiuutinut tapiissutissat, Inuit Ataqatigiinnit isornartorsiorneqartut sammineqarlutik.
Aningaassaliissutit 8 millionit koruunittaaq allatut agguaanneqarnissaat Inuit Ataqatigiit kissaatigaat.
Efterskolenut 3 millionit koruunit, højskolenut 3 millionit koruunit 2 millionit koruunillu isumaginninnermut tunngasunik namminersortut suliniutaannut pineqartunut eqqarsaatigineqarlutik.