Inatsisartuni ullormut pisussat
Kalaallit Nunaanni suliffissarsiortut killilersimaarnissaat pillugu Naalakkersuisut siunnersuutaat, Inuussutissarsiornermut suliffeqarnermullu naalakkersuisunngorlaap Randi Vestergaard Evaldsenip saqqummiutissavaa.
Taamaalereerpat Aningaasaqarnermut naalakkersuisup Vittus Qujaukitsup aningaasarsianit akileraarutit pillugit inatsimmut allannguutissatut siunnersuut saqqummiukkumaarpaa.
Taava Aalisarnermut aningaasaliissutinut immikkoortitat pillugit inatsimmut allannguutissatut siunnersuutit Aalisarnermut naalakkersuisumit Karl-Kristian Krusemit saqqummiunneqassapput.
Mittarfinnillu pilersaarusiornermut tunngasut assigiinngitsut Inatsisartut aamma oqaluuseriumaarpaat, assersuutigalugu aningaasaleeriaasissat allassimasut mittarfinnik pilersaarusiornissamut sanaartornissamullu Naalakkersuisut peqquneqarnissaannik Inatsisartut aalajangiiffigisassaattut siunnersuut eqqartussavaat, Inatsisartullu sanaartornermut ataatsimiititaliaanni ilaasortat isumaqatigiissut siunnersuummik saqqummiussisuussallutik.
Inatsisartullu ullumi ataatsimiinnissaanni naggasiutigalugu oqaluuserineqartussaq tassaavoq peqatigiiffiit eqquiniaasitsineranni akileraarutinik akiliuteqartarunnaarsillugit eqquiniaasitsinermi akileraarutit pillugit inatsimmi allannguutissat oqaluuserineqassallutik.
