Inatsisartuni ullormut pisussat

Assersuutigalugu sulisussamik illoqarfimmit allamit atorfinitsitsinissamut tapiissutinik pissarsisoqarsinnaalissaaq, sulisussarsiarineqartoq sulisitsisup piginnaasanik piumasaqaataanut piukkunnaateqarpat, sulisitsisullu illoqarfigisaani suliffissarsiortutut nalunaarsorsimasoqarnera apeqqutaatinnagu.

Allannguutit nunaqavissut amerlanerusut Nunarput tamakkerlugu atorfinissinnaanissaannut aqqutissiueqataassapput.

Siunnersuut taanna oqaluuserineqareerpat Inuit Ataqatigiit aalajangiiffigisassatut siunnersuutaat pingasut oqaluuserineqassapput. Siunnersuut siulleq inuit aanaartoornerup taqqatigulluunniit milittoornerup kingorna siunnerfeqarnerusumik ataqatigiinnerusumillu sungiusaqqinnissamik neqeroorfigineqarnissaannut tunngassuteqarpoq. Nunatsinnimi taamatut eqqugaasartut amerliartuinnarput.

Pilertornerusumik sungiusaqqinneqarnerisigut kommunit angerlarsimaffimmi ikiorteqartitsinermut ikiuutinullu allanut aningaasartuutinik sipaaruteqarsinnaapput.

Danskit ilinniarnermi siuariartornissaq pillugu aaqqissuusseqqinnerat pillugu paasisassarsioqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut Inatsisartuni aamma oqaluuserineqassaaq.

Ilinniartut ilinniarnerminnik siusinnerusukkut naammassisalernissaat aaqqissuusseqqinnermi siunertaavoq, kalaallilli ilinniartut tamatuminnga sakkortunerusumik eqqugaanissaat Inuit Ataqatigiinnit aarlerineqarpoq.

Tamanna Naalakkersuisut nassuerutigaat, ilinniartullu oqaatsitigut kulturikkullu sapinngisamik qulakkeeriffigineqarnissaannut suliniutinik assigiinngitsunik aallartisaareersimapput.

Taakkulu ilagaat ilinniarnerup aallartinnginnerani ilinniartut Danmarkimi højskolini sivikitsumik sukumiisumilli pikkorissartittalernissaat.

Kiisalu nuna tamakkerlugu ukiunut 10-20-nut sanaartugassanik pilersaarusiortoqartalernikkut iluaqutissartaasinnaasut Inatsisartut oqaluuserissavaat, kommunit sanaartugassanillu suliaqartut pilersaarusiornissaminnut, minnerunngitsumik aningaasaqarneq eqqarsaatigalugu, periarfissaat pitsaanerulersinniarlugit.

Tamanna pereerpat siunnersuisoqatigiinnut aalajangiisartutullu ataatsimiititalianut ilaasortassanik sinniisussaannillu qinersisoqassaaq, tamannali ataatsimiinnermi matoqqasumi ingerlanneqartussaavoq.