Inatsisartuni ullormut pisussat
Uumasut nappaataannik inunnut tunillaassorsinnaasunik taakkulu akuinik siaruaassinnaasunik akiuiniarneq pillugu inatsisissatut siunnersuut siullermeerlugu oqallisigineqassaaq.
Uumasut nappaataasa inunnut tunillaassorsinnaasut nakkutigineqarnissaannut, malittarisassaliornissaannut akiorniarneqarnissaannut aalajangersakkat pillugit inatsiliortoqarnissaa matumani siunertaavoq.
Taamaalereerpat Kalaallit Nunaata Aatsitassarsiornermi Aningaasaateqarfia pillugu inatsimmut allannguutissatut siunnersuut oqaluuserineqassaaq. Inatsimmi paragraf 50-imi aalajangersakkat atuutilernissaannut piumasaqaatit allanngortinneqarnissaannut siunnersuutit Inatsisartut oqaluuserissavaat.
Pingajuattullu eqqartorneqartussaq tassaavoq Geodatastyrelse pillugu inatsisip atuutilersinneqarnissaanik siunnersuut. Danmarkip maanna siunissamilu Kalaallit Nunaata nunataa pillugu tunngaviusumik paasissutissaataasa ammaanneqarnerat matumani oqaluuserineqassaaq.
Inatsisartullu oktobarip ulluisa 15-ianni oqaluuserisassaasa kingulliat tassaavoq CPR-imut inatsimmut allannguutissatut siunnersuut. Tassa soorlu Inatsisartut nittartagaanni allassimasoq CPR-imut inatsisip allannguutaanut Kunngip peqqussutaata Kalaallit Nunaannut atuutitinneqarnissaanik peqqussut pillugu Naalakkersuisut oqaaseqaateqarnissaat pillugu Inatsisartut eqqartussavaat.
