Inatsisartuni ullormut pisussat
Inuit Ataqatigiit taama siunnersuuteqarput, taamattumillu Naalagaaffiit Peqatigiit inuit innarluutillit pillugit Isumaqatigiissutaanni pisinnaatitaaffiit siuarsarneqarnissaannut Naalakkersuisut peqquneqarnissaannik siunnersuutigalugu. Siunnersuut ullumi siullermeerneqassaaq.
Tamatumalu oqaluuserneqannginnerani Atlantikup avannaata Nunattalu silaannartaasa angallavigineqarnerisa allaffissornikkut aqunneqarnerata naalagaaffeqatigiinnut nuunneqarnissaa pillugu Namminersorlutik Oqartussat danskit naalakkersuisuinut saaffiginnissuteqarnissaanik siunnersuut oqaluuserineqassaaq. Siumumeersup, Demokraatineersup Inuit Ataqatigiinneersullu tamanna ataatsimoorullugu siunnersuutigaat.
Taamatut siunnersuuteqarneq Atlantikup avannaata Nunattalu silaannartaata ilaata maannakkut Islandimi Canadamilu silaannakkut angallannermut oqartussaasunit aqunneqarneranik Sanaartornermut Ataatsimiititaliap paasisaqarsimaneranik peqquteqarpoq.
Inatsisartut ullumikkut ataatsimiinnerat akunnermik apeqqarissaarfiusumik aallarnerneqassaaq, tassanilu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen apeqqarissaarfigineqassalluni.
Inatsisartut ataatsimiinnerat KNR radiokkut aallakaatissavarput, aammattaaq oqallinnerit tv-kkut, KNR 2-kkut, isiginnaarneqarsinnaapput.
