Inatsisartuni ullormut pisussat
Ullormut oqaluuserisassani immikkoortoq siulleq tassaavoq umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit inatsisartut inatsisaata allanngortinneqarneranik Inatsisartut inatsisissaattut siunnersuut. Allannguutissatut siunnersuuteqarnermi umiarsuarnut takornariartaatinut akitsuutit appartinneqarnissaat allaffissornikkullu allannguuteqartitsinissaq pineqarpoq. Inatsisip allanngortinneratigut umiarsuarnut takornariartaatinut ilaallutik takornariat amerlanerulersinnissaannut Nunatta unammillersinnaanerulernissaa anguniagaavoq.
Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaannut allannguutitassat annikitsut ualimut sammineqassapput. Sulisitsisut akileraarutinik A-nik akiliuteqarnissaannut piffissaliussat allanngortinneqarnissaat pineqarpoq, tassalu piffissaliussaq qaammatip akiligassanngorfiup ulluisa qulinganniit qaammatip akiligassanngorfiup kingorna qaammatip tulliuttup ulluisa aallaqqaataannut allanngortinneqassalluni.
Ullormut oqaluuserisassani immikkoortut pingajuattut oqaluuserineqartussaq tassaavoq, aningaasanoorutit pillugit inatsisip atuuttup danskit tamatumunnga inatsisaannut naleqqussarnissaa, nunat taakku marluk akornanni inatsisitigut ataqatigiissinnissaat siunertaralugu. Tamatumunnga peqatigitillugu Kalaallit Nunaata Danske Spil-ip iluanaarutaanit pissarsisarunnaarmalli, danskit naalagaaffiata Kalaallit Nunaanni Namminersorlutik Oqartussanut ukiumoortumik aningaasanik taartisiassanik nuussisarnissaanik qulakkeerissaaq.
Inatsisartullu ullormullu oqaluuserisassaanni immikkoortut kingullersaattut Inuit Ataqatigiit ulluni makkunani sammineqartupilussuaq pillugu apeqquteqaat aallaavigalugu oqallinnissamik siunnersuuteqarput, tassalu Pituffimmi sakkutooqarfik matumani pineqarpoq.
Amerikamiut nunatsinniinnerannit Kalaallit Nunaat sutigut iluaquserneqassava? Aningaasatigut pissarsiassatigut qanoq piumasaqaateqassaagut, isumaqatigiissutillu sorliit isumaqatigiinniutigineqaqqinnissaannik piumasaqaateqassaagut?, IA-p siunnersuutaa ilaatigut taama oqaasertaqarpoq.
