Inatsisartuni ullormut pisussat
Inatsisartullu ataatsimiinnerat nalunaaqutaq ataatsimut aallartissaaq, siullertullu 2014-imut Ilassutitut aningaasaliissutissanut inatsisissatut siunnersuut pingajussaaneerneqassaaq, siorna ilassutitut aningaasaliissutaasut tamatumani oqaluuserineqassallutik.
Sulisoqarnermut akitsuutinik akiliuteqarnissamut piffissaliussat nutaat tulliullugit oqaluuserineqassapput. Suliffeqarfiit akitsuutinik akiliinissaannut piffissaliussaq ullunik qulinik sivitsorniarneqarpoq - piffissaq akileraarutinik A-nik akiliuteqarfiusartoq assigilissallugu. Siunnersuut partiinit tamanit taperserneqarpoq.
Tamatuma kingorna, aningaasanoorutit ilaat pillugit inatsisip allannguutissaatut siunnersuut aappassaaneerneqassaaq. Danmarkimi Nunatsinnilu aningaasanoorutinut inatsisit tamatumani ataqatigiissinniarneqarput, Kalaallit Nunaatalu Danske Spil A/S-ip sinneqartoorutaanit pissarsisarunnaarneranut taarsiullugu ukiumoortumik aningaasanik pissarsisalernissaanik qulakkeerissalluni. Siunnersuut partiinit tamanit taperserneqarpoq.
Taava nunatta karsiata 2014-imut naatsorsuutaasa Inatsisartunit akuerineqarnissaat siullermeerneqassaaq. Tamatumanilu naatsorsuutit oqallisaasupilussuit pineqarput, sinneqartooruteqarfiusussatut missingersuutigineqaraluartut 222 millionit koruuninik amigartooruteqarfiusimallutik. Tamannalu qularnanngitsumik Inatsisartuni oqallisaalluassaaq.
Tamanna pereerpat, Inatsisartuni partiit tamalaat akornanni ukiuni tulliuttuni inuussutissarsiornermi periusissat pillugit isumaqatigiissusiortoqarsinnaanera pillugu apeqquteqaat tunngavigalugu oqallinnissamut siunnersuut Inuit Ataqatigiit siulittaasuannit Sara Olsvigimit saqqummiunneqassaaq. Inatsisartuni tamanit peqataaffigineqartumik isumaqatigiissusiornermi inuussutissarsiutit pingaaruteqarnerit, soorlu aalisarneq, sanaartorneq, aatsitassarsiorneq, nunalerineq takornariartitsinerlu ilanngunneqartariaqartut, Sara Olsvig oqallisissiamini taama allappoq. Taamatullu eqqarsaatersuuteqarnera Naalakkersuisut isumaqatigaat.
Tamanna pereerpat, Sara Olsvigip parteeqataatalu Naaja Nathanielsenip "Kalaallit Nunaata uuliasiornermut aatsitassarsiornermullu 2014-imit 2018-imut periusissaani" nutaami Naalakkersuisunit saqqummiunneqartumi paasissutissat aallaavigalugit aatsitassarsiornermi suliffissuaqarnitta ineriartortinnissaanut periarfissat pillugit apeqquteqaat aallaavigalugu oqallisissiatut siunnersuut saqqummiutissavaat.
