Assi: Nils Baum/Bureau for Inatsisartut

Inatsisartuni sisamanngornermi pisussat

Inatsisartut ullumi sisamanngornermi ataatsimiilerpata immikkoortut sisamat oqaluuserineqassapput.

Siunnersuut pisortani akiliisitsisarnerup aqunneqarnerata nutarteriffiginissaanut pisariillisarneqarnissaanullu tunngavissaqalersitsisussaq siulliullugu oqaluuserineqassaaq. Pisortani suliassat pisariinnerulernissaat, sunniuteqarnerulernissaat ataqatigiinnerulernissaallu tamatumani siunertaavoq.

Illuliortiternernut aningaasalersuineq pillugu siunnersuut tulliullugu oqaluuserineqassaaq. Nuna tamakkerlugu innuttaasut nammineerlutik inissiamik pisinissaannut aningaasalersuinerup ajornannginnerulersinneqarnissaa siunertaavoq.

Siunnersuummi Nuup avataani inissianik sananissamut killiliussat pitsaanerulersinneqarnissaat, tamatumunngalu peqatigitillugu Nuummi inissianik sananissamut aningaasalersuisarnerup nalinginnaanngorsarneqarnissaanik aallartitsinissaq siunertarineqarpoq.

Inatsisartut ullormut oqaluuserisassaanni immikkoortut pingajuat inissianut aamma tunngavoq.

Pisortat inissiaataanni attartortittakkani Nukissiorfinnit kiassarnermik pilersorneqartuni ataasiakkaanut kiassarnermut uuttuutinik ikkussuinissaq tamatumani pineqarpoq. Inissiat 3.000-it missaanniittut kiassarnermut uuttuutinik ikkussuiffigineqarnissamut piareeqqasut ingeniøritut siunnersuisartutut suliffeqarfiup Rambøllip nalunaarusiaani oqaatigineqarpoq, ikkussuinerullu aallartisarneqarsinnaanissaa inatsisissatut siunnersuummi anguniarneqarpoq.

Kingulliullugu oqaluuserineqartussaq tassaavoq pappiaqqat nalillit ilaannit inuit iluanaaruteqartarnerannit annaasaqartarnerannillu akileraartarnermi malittarisassat nutaat. Aningaasaliissutitigut isertitat allat assigalugit iluanaarutit Nunatsinni akileraarusertarnissaat siunnersuutikkut anguniarneqarpoq.

Malittarisassat nutaat juulip aallaqqaataani 2019-imi atuutilersinneqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat