Inatsisartuni partiit tamarmik Naalakkersuisunut erseqqissaasut
Pituffimmut kiffartuussinissamut isumaqatigiissut annaaneqarsimanera Inatsisartuni partiit tallimaasut ilungersuumminartutut isigaat. Taamaattumik Inatsisartuni partiit tamarmiusut ataatsimoorlutik oqaaseqaateqarput:
- Taamatut oqaaseqarneq, erseqqissuliorneq partiit tamakkerluta inatsisartuniit naalakkersuisunut, tassaavoq aamma naalakkersuisunut mianersoqqussut, danskisut taasarpaat næse. Taannalu isumaqarpunga naalakkersuisut tusaasariaqaraat qisuariaateqarfigalugulu, Sara Olsvig Inuit Ataqatigiinniit taama oqarpoq.
Naalakkersuisooqatigiinni partiip siuttuusup Inatsisartuni isumaqatigiittumik oqaaseqarnissaq pingaaruteqarneranik naalakkersuisooqatigiinnut mianersoqqusinermut peqataanerminnut tunngavilersuutigaat.
- Uani siumuminngaanniit pingaartipparput, nunarput ataasiukannertumik nipeqarnissaa avammut isumaqatigiinniarnerit ingerlanneqaraangata nunanut allanut suleqatitsinnut. Taamaammat uani siunertaavoq, kalaallit maanilu nunallit ataatsimoorpugut uani oqariartuummi, Jens Erik Kirkegaard taama nassiuiaavoq.
Siumumiit naqissuserneqarpoq kiffartuussinissamik isumaqatigiissutip annaaneqarnera ilungersuumminartutut isigigitsik aamma siunissami taama pisoqaqqinnginnissaa pillugu partiit tamakkerlutik suleqatigiissuteqarniartut:
- Uani inatsisartuninngaanniit oqallinneq toqqammavigalugu, piffissaq qaninneq isigalugu ungasinnerlu isigalugu angorusutat uani oqariartuutigivagut, Jens Erik Kirkegaard Pituffik pillugu oqallinnermi Siumut sinnerlugu oqaaseqartartuusoq taama oqarpoq.
Taamaattumik ataatsimoorluni oqaaseqaateqarnermi IAp kissaatigaa siunissami anguniagassat pitsanngorsarneqassasut:
- Illersornissamut isumaqatigiissutaasut amerikamiunut misissoqqittariaqarpagut, sukkut sukateriffigisinnaanerlugit aalajangiiffiginissaat siunertaralugu, aammalu isumaqatiginninniuteqartoqaqqinnissaa siunertaralugu, Sara Olsvig Inuit Ataqatigiinneersoq taama oqarpoq.
Uani sapaatip akunnerani pituffik pillugu oqallittoqangaatsiarpoq, apeqquteqaat aallaavigalugu oqallittoqarnerani ataatsimoorlutik oqaaseqaasiornermik naggaserneqarpoq.
Partii Naleqqakkunniillu partiit sinneruttut assigalugit illersornissamut isumaqatigiissutaareersut misissorluarneqassasut angorusuppaat. Ataatsimoorlutillu oqaaseqaatilioraluarlutik partiit tamarmiusut oqallinnermi oqaaseqaataat suli atuutsinneqarpoq. Tamannalu partii naleqqamiit oqaatigineqarpoq:
- Qitiulluinnaqqissaarsimavoq tamatsinnut ataatsimoorluta oqariartuuteqarnissatsinnut Danmarkimut USA-mullu, taannalu oqaaseqaatiliornitsinnut tunngaviorpiaavoq. Kisiannili aamma parti naleqqaminnganniit pingaaruteqarluinnaqqissaarsimavoq uumap oqaaseqaatip partiit ataasiakkaat oqallinnermi oqaaseqaataanut taarsiutaassanngitsut, Per Rosing Petersen oqarpoq.
Amerikamiut sakkutooqarfeqarnera pillugu oqallittoqareeraluaqisoq ataatsimoorluni oqaaseqaateqarnerup oqallinneq unitsinneqarneranik isumaqanngitsoq illuatungiliuttut partiivisa annersaat oqarput:
- Una ingerlariaqqinnissamut alloriarfissaavoq naammassineqanngilaq, Sara olsvig taama oqarpoq.
Aamma partiit tamarmiusut kajumissaarutigaat, pituffimmi kiffartuussinissamut isumaqatigiissut pillugu eqqartuussissuserisut misissuinerat saqqummiunneqassasoq.
