Inatsisartuni partiit Aningaasanut Inatsimmi 2023 pingaarnerpaatitaat
Inuusuttut Inuit Ataqatigiinnit pingaarnerpaatinneqarnerat, taakkua aningaasaqarnermut oqaaseqartartuata Asii Chemnitzip ima tunngaveqartippaa:
- Inuusuttut tassaapput nunatta siunissai. Meeqqat atuarfianniit ingerlariaqqinngitsoortartut ukiorpassuarni sammigaluarpagut. Pinngitsoornata ilinniarfeqalernissaat suliffeqalernissaat qulakkeertariaqarparput, taamaalillutik inuiaqatigiinni peqataasutut suleqataasutullu inissinniassammata.
Akitsuutinik piiaaneq pingaarnerpaasoq
Demokraatit siulittaasuata Jens Frederik Nielsenip Aningaasanut Inatsimmi pingaarnerpaatitamik ilaanerat aamma nuannaarutigaa:
- Akitsuutinik piiaanermut siunniussarput iluatsipparput. Tassa maannakkut akit qaffakkiartorneranni aningaasallu nunarsuarmi naleerukkiartorneranni aamma innuttaasut suli artornerusumik atugaqariartuaarneranni, pingaartuteqarpoq pisortaniit iliuuseqarnissaq. Uagullu inoqatigiit iluanni aningaasaqarneq assut pingaartillugu, inuuniarneq akikinnerulersikkusullugu sulinerput iluatsilluarpoq, taanna oqarpoq.
Utoqqaat atugaannik aaqqissuusseqqinneq pingaarnerpaavoq
Siumup utoqqaat aaqqissuussiffigineqarnissaat pingaarnerpaatikkaa, Siumup aningaasaqarnermut oqaaseqartitaata Hans Peter Poulsenip naatsumik ima erseqqissarpaa:
- Utoqqalinersialinnut pitsaasunik pilersitsisinnaanerup toqqammavissikkiartornerata attannera uagutsinnut pitsaanerpaavoq.
AAMMA ATUARUK Meeqqanut immikkoortortaqalerlunilu immikkut iliuuseqalertortoqassasoq
Nunatta tamarmiusup ineriartornera pingaarnerpaasoq
Naleqqameersup Jens Napaattuup aningaasanut inatsimmi nuna tamakkerlugu isiginiarneqarmat nuannaarutigaa:
- Tassa nunaput tamaat ataatsimut isigalugu, ineriartorneq aallartinnera angusaq angisoorujussuuvoq, aamma peqqinnissaqarfik ilanngullugu pitsaanerusumik alloriarfiunissaa - ataatsiinnaq taaqqussagatsigu, taakku pingaarnertut taasinnaavakka, taanna oqarpoq.
AAMMA ATUARUK Aningaasanut inatsit inissittoq: Partiit tamarmik isumaqataapput
Toqusut timaannik angallassinerup pisortanit akilerneqartalernissaa
Atassutip Aningaasanut Inatsimmi angusatut pingaarnerpaatut naliligaa siulittaasuata Aqqalu Jeremiassenip ima nassuiarpaa:
- Toqusut timaasa angerlaannerannut akilerneqartalernissaat, toqqaannartumik sunniuteqartussaammata inuuniarnikkut ilaatigullu inuit nanertisimanermik eqqorneqareersut artukkeqqinnagit iliuuseqarneq pitsaasutut isigigatsigu.