Inatsisartunut ilaasortaq toqutsinissamik siorasaarisimasutut unnerluutigineqartoq: Pinngitsuunerarpoq
Inasisartunut qinersinermi kingullermi Siumumiit sassarluni taagunneqarnerpaat pingajuat, Aslak Jensen toqutsinissamik siorasaarisimasutut unnerluutigisaalluni Eqqartuussisoqarfik Sermersuumi sassartinneqassaaq. Tamatuma pinissaa suli ullulerneqanngitsoq, Kalaallit Nunaanni Politiit KNR-imut paasissutissiipput.
Tamanna unnerluussisummi suliami allagaatinik takunnissinnaatitaaneq atorlugu KNR-ip pissarsiarisimaasaani allaqqavoq.
Aslak Jensen Kommuneqarfik Sermersuup inunnik isumaginnittoqarfianut 2017-imi martsip 17-iani nalunaaqutaq 12:45-p missaani sianersimavoq, tassanilu isumaginninnermik sulialik toqunniarlugu siorasaarsimallugu.
Unnerluussisummi allassimasut malillugit Aslak Jensen ilaatigut ima oqarsimavoq:
- Ilissi politeersuillu toqorassuassi.
- Kinaanerit ujartussuakkit. Utaqqilaarit toqussuakkit.
Taamaalilluni isumaginninnermi sulisup inuunerminik, peqqinnerminik atugarissaarnerminillu unnerluussummi allassimasut naapertorlugit assut ersiortilerlugu.
Aslak Jensenip illersuisua, Finn Meinel KNR-ip oqaloqatigaa. Aslak Jensenip unnerluutigineqartut pinngitsuunerarfigigai illersuisuata oqaatigaa.
Siumumut ilaasortamut pinerluttulerinermi suliat pingajuat
Aslak Jensen taamaalilluni Siumut sinnerlugu qinikkani saqqumilaarnerit, inatsisartunut kommunimullu qinersinerup kingorna eqqartuussivimmut suliassanngortinneqartut eqqartuusaasulluunniit pingajorilerpaat.
AAMMA ATUARUK Minik Høegh-Dam hashimut tunngatillugu suliamut oqaaseqarnianngitsoq
Minik Høegh Dam Avannaata Kommuniani qinerneqarnerpaatut borgmesterinngortussatut inissereeraluarluni uppisinneqarpoq. Taanna ikiaroornartut pillugit unnerluunneqarpoq. Minik Høegh-Dam eqqartuussivimmi pinngotsuutinneqarpoq, unnerluussisussaatitaasulli suliaq Nunatta Eqqartuussisuuneqarfianut suliareqqitassanngortippaa.
AAMMA ATUARUK Qarsoq Høegh-Dam Inatsisartunit tunuartoq
Taassuma nukaa, Siumummilu Inatsisartunut qinerneqarnerpaat ilaat, Qarsoq Høegh Dam, qinersinerup kingorna Inatsisartuni ilaasortaanissamut piukkukkunnaarami nammineerluni ilaasortaajunnaapoq. Ikiaroornatoq pillugu eqqartuussaasimasuusoq saqqummiunneqareersorlu tamanna pivoq.