Qarsoq Høegh-Dam Inatsisartunit tunuartoq
Qarsoq Høegh-Dam Siumeersoq Inatsisartunut apriilip ulluisa arfernanni qinigaasoq Inatsisartunit tunuaqqammerpoq.
Taanna Facebookimi taama allappoq.
Inatsisartuni amerlanerussuteqartut Inatsisartuni ilaasortanngortussatut piukkunnanngitsutut nalilerumaaraanni ilimagigini, taanna allappoq.
Inatsisartunut qinigaarlaat pisortatigoortumik akuerineqannginnerminni ullumi tallimanngornermi ataatsimeerngaassapput. Qinigaarlaallu Inatsisartunut ilaasortanngortussatut piukkunnarnersut piukkunnannginnersulluunniit, Inatsisartut aamma naliliissapput.
AAMMA ATUARUK Ataatsimut isigalugu: Inatsisartunngortut ullumi siullermeertumik ataatsimiissasut
Qarsoq Høegh Dam Inatsisartunit tamanna sioqqullugu tunuarpoq.
- Ulloq Inatsisartunut ivertinneqarneq kalaallisoorluni persuarsiorfittut atorneqartussaavoq. Taamaammat Inatsisartunut qinikkat amerlanerussutillit ilimanaatilimmik aalajangiinissaat sioqqutsinniarlugu Inatsisartuniit tunuareerniarlunga aalajangerpunga.
Qarsoq Høegh-Dam Inatsisartunut qinersinermi 796-inik qinersiseqarpoq.
Qarsoq Høegh-Dam tuniniagassamik 49 grammimik, politiit angerlarsimaffiani 2015-imi oktobarimi misissuinerminni nassaarisaannik, ikiaroornartuuteqartutut unnerluutigineqarluni eqqartuussaanermini pisuutinneqarpoq. Pineqaatissinneqarsimasunut sapaatit akunneranni inissiisarfimmiittussanngortitaavoq, tamannali suliassanngorteqqinneqarluni.
Tamanna Nunatta Eqqartuussisuuneqarfiani 2019-imi oktobarimi suliareqqinneqarpoq, ikioroornartorli angerlarsimafianiittoq tuniniagassaanersoq uppernarsarneqarsinnaasimanani. Taamaammat Qarsoq Høegh-Dam akiliisussanngortinneqaannarpoq.
Suliarlu aalajangiiffiginiaaruusaarneqarmat 1500 koruuninik akiliisussanngortinneqaannarpoq.
Qarsoq Høegh-Damip pineqaatissinneqarsimannginnermut uppernarsaateqarnini Facebookimini erseqqissaatiginikuuaa.
Taanna Inatsisartunut apriilip ulluisa arfernanni qinersiseqarluarpoq. Tassa 796-inik qinersiseqarpoq, Siumumeersunilu taaguunneqarnerpaanut ilaalluni. Taakku tassaapput Aslak Vilhem-Jensen, Erik Jensen Kim Kielsenilu.
Qatanngutaa Siumumit anisitaasoq
KNR-ip Siumup siulittaasua, erik Jensen, oqaaseqartinniaraluarpaa, sulili iluatsinngitsumik.
Qarsoq Høegh-Damip qatanngutaa, Minik Høegh-Dam, Siumumit anisitaagami maannamut sapaatit akunnerluinnaa qaangiuppoq.
Avannaata Kommuniani borgmesterinngortussanngoraluarpoq, Siumulli siulersuisuunerisa suliaq hashimik tuniniaasoqarsimaneraanermut tunngasoq pissutigalugu partiimit anisippaat.
Minik Høegh-Dam hashimik 300 gram ataallugu oqimaassuseqartumik tuniniaanikkut ikiaroornartut pillugit inatsimmik unioqqutitsisimasutut unnerluutigineqarnikuusimavoq. Suliaq taanna Eqqartuussisuuneqarfik Sermersuumi marsip ulluisa 25-anni tassa qineqqusaartoqarnerani pinngitsuutitsinermik inerneqaraluartoq Nunatta Eqqartuussisuuneqarfianut suliareqqitassanngortinneqarpoq.
Aningaasat 154.805 koruunit politiit Minik Høegh-Damip inaani uppernarsaatissanik 2018-imi aggustip ulluisa 24-anni ujaasineranni nassaarineqarput. Aningaasallu taakku politiit hashimik tuniniaanermiinngikkunik allamik unioqqutitsisumik iliornermeersuusoraat.