Ataatsimut isigalugu: Inatsisartunngortut ullumi siullermeertumik ataatsimiissasut
Qinersisoqarneranit ullut 17-it qaangiupput.
Inuit Ataqatigiit Naleqqallu naalakkersuisoqatigiilersunik saqqummiussinerannik sapaatip akunneqqissaaq qaangiuppoq.
Inatsisartunngortullu pisortatigoortumik ullumi akuerineqassapput.
Inatsisartut aamma Naalakkersuisut nutaat
Inuit Ataqatigiit apriilip ulluisa arfernanni qinersisoqarnerani Inatsisartunut 31-nit aqqaneq-marlunnik qinigaatitaqarnissartik qulakkeerpaat.
Partiip Naleraq sisamanik qinigaatitaqartoq naalakkersuisoqatigiinnissamik maanna isumaqatigiissuteqarfigaa.
Taakku katillutik 16-iupput, partiillu taakku marluk taamaalillutik Inatsisartuni amerlanerussuteqalerlutik.
Atassut partiitut ikorfartortaanissani aalajangerpaa. Atassut marlunnik qinigaatitaqarpoq.
Illuatungiliuttuniipput Siumut qulinik qinigaatitaqartoq, Demokraatillu pingasunik qinigaatitaqartoq.
Suleqatigiissitsisut Nunatta Qitornaalu qinigaatitaqaqqinngillat.
Inatsisartunulli ilaasortat 31-t akuersinnginneranni Hans Egedep Illuani ullaakkorsioqatigiissapput, ataatsimoorlutillu Annaassisitta Oqaluffiani nalunaaqutaq qulinut naalagiaqatigeeriarlutik Inatsisartuni katersuutissapput.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Inatsisartut inissititeriffiusumik nalunaaqutaq aqqanermut katersuutissapput. Tassanilu ilaasortat tamarmik 31-usut inissaminnut ingissapput, Hans Enoksenilu 64-inik ukioqartoq utoqqaanersaasoq ammaassalluni.
Taanna Rigshospitalimi uummatimigut siorna suliaritereernermi kingorna atuuffimminiileqqippoq.
- Kingullermi qinigaaffimmi 2018-imi ataatsimiinnermik aamma ingerlatitsisuuvunga. Qilanaarpunga ammaanersiornermullu peqataanissannut nukissaqartutut misigisimavunga, Hans Enoksen KNR-imut oqarpoq.
Naalakkersuisup allattaa Naalakkersuisunngortoq
Inatsisartuni nutaani ilaasortat nutaat aqqaniliupput. Eqaluk Høegh Inuit Ataqatigiinneersoq taakku ilagaat.
Taanna meeqqanut, inuusuttunut, ilaqutariinnut inatsiseqarnermullu naalakkersuisutut ullumi akuerineqassaaq.
Taanna Kim Kielsenimut allattaanikuuvoq. Taannalu Tasiilamut tunngatillugu suliaq pissutigalugu videoliamik Facebookimut 2019-imi maajimi ikkussinermini atuuffimminit soraarpoq.
AAMMA ATUARUK IA Nalerarlu Naalakkersuisut tullissaanik ilusiliissasut
DR-ip isiginnaagassiaq piviusuinnik tunngaveqartoq ”Byen hvor børnene forsvinder” 2019-imi maajimi saqqummersippaa, tassanilu Tasiilami meeqqat pingasuugaangata ataaseq kinguaassiutitigut atornerlugaasimasartoq meeqqallu marluugaangata ataaseq pillugu kommunimi isumaginnittoqarfimmi suliamik ingerlatsisoqartartoq takutinneqarpoq.
IA-mit ilaasortanngortoq nutaaq tassaavoq, Kommuneqarfik Sermersuumi borgmesteriusimasoq, Asii Chemnitz Narup.
Qinersinissamut aqaguttoq partiit siulittaasuisa apeqqarissaarfigineqarneranni nuannattoqartoq. Assi: Malik Brøns/KNR
Taassuma tunuarnerani Tasiilamut tunngatillugu suliaq aamma pissutaavoq, Demokraatillu taamani tassunga tapersersuiunnaarnikuullutik.
Taaguunneqarluartoq, Asii ullumikkut aningaasaqarnermut nunamullu imminermut naalakkersuisutut ullumikkut akerineqassaaq.
Taannalu isumaginninnermut peqqinnissamullu naalakkersuisuunikuulluni.
Ilaasortat immikkut ittumik aalajangiiffigineqartussat
Ataatsimiinnermi Inatsisartunut Naalakkersuisunullu siulittaasussanik aamma toqqaasoqassaaq – Naleqqap siulittaasua, Hans Enoksen siullermut innersuunneqarpoq, IA-llu siulittaasua, Múte B. Egede kingullermut innersuunneqarluni.
Inatsisartuni atatsimiititaliamut ilaasortassanik sinniisussanillu aamma toqqaasoqassaaq.
Ullormulli oqaluuserisassani pissanganarnerpaaq ullup aallartilaarnerani pissaaq, tassa Inatsisartunut ilaasortat nutaat akuerineqarnissaat.
Qinigaasinnaanermut Ataatsimiititaliap Inatsisartunut ilaasortat nutaat naliliiffigai. Taakkulu ilaasortanik immikkut ittumik aalajangiiffigineqartussaqaraangat Inatsisartunut inassuteqartarlutik. Ilaasortassullu inassuteqaammut taasisarput.
AAMMA ATUARUK Siulittaasoq: Arnat angutillu ataatsimooraangamik tamatigoornerusumik aalajangeeqatigiittarput
Taama pisoqaraangat ataatsimiittarfimmi assiliutit qaminneqartarput. Ataatsimiinnerummi ilaa taanna tamanut matoqqasuusarpoq.
Aamma ilaasortanik akuerineqanngitsussaqarneranik tamanna isumaqarsinnaavoq.
Siornatigut taama pisoqarnikuuvoq. Partii Inuinnit Nikku Olsen 2013-imi qinigaasinnaanngitsutut nalunaarutigineqarpoq – taamaalilluni Inatsisartunut ilaasortatut akuerineqarani. Tamannalu nakuuseq pillugu eqqartuussaasimanermik pissuteqarluni.
Naalakkersuisuni ilaasortat nutaat tamarmik akuerineqassanersut ilisimaneqanngilaq.
- Inatsisartunut ilaasortanngoraanni inatsisinik unioqqutitsisimannginnissaq piumasaqaataavoq. Ingammik pinerluttulerinermik inatsimmik, Hans Enoksen oqarpoq.
