IA Nalerarlu Naalakkersuisut tullissaanik ilusiliissasut

Inuit Ataqatigiinnut Naleqqamullu ulloq nalliuttorsiorfiuvoq.

Partiimmi taakku marluk naalakkersuisooqatigiinnissamik isumaqatigiissuteqarput. Tamannalu nalliuttorsiorneqassaaq.

Ulloq partiinut taakkununnga marlunnut angisooq kulturikkut nalliuttorsiornermi ilaqartumik nalliuttorsiutigineqarpoq.

Partiit nalliuttorsiornerat Kalaallit qulliannik ikitsinermik nalunaaqutaq 16.15 ammarneqarpoq.

Tamatuma kingorna tivasoqarpoq naalakkersuisooqatigiinnissamullu isumaqatigiissut kingorna saqqummiunneqarluni.

- Nunarput ukiuni kingullerni avissaartuuffiusoq aammalu avissaarfigut aallaavigalugit ingerlatsiffiusoq qimallugu naalakkersuisoqatigiit Inuit Ataqatigiit, Naleraq aammalu tapersersortaasoq Atassut, inuiaat ataatsimoorfii aallaavigalugit sulineq tunngavississavaat, Inuit Ataqatigiit siulittaasua Múte B. Egede oqarpoq.

Atassut naalakkersuisoqatigiilersunut ikorfartortaassaaq.

Naalakkersuisoqatigiinnissamik isumaqatigiissut ima qulequtaqarpoq: Nammaqatigiinneq, Patajaassuseq, Siuariartorneq.

- Siullermik inuiannut tamanut qujassutigerusuppara qineqqusaarnermi taamatut ikiuulluarsimanerat aammalu ataqqeqatigiissummik ingerlatsineq tapersersorlugu oqariartuuteqarnerat, Naleqqap siulittaasua Hans Enoksen oqarpoq. 

Assi © : KNR / Marie Kuitse Kristensen

Partiit siulittaasuisa naalakkersuisoqatigiinnissamik isumaqatigiissut ammaanersiornermik oqalugiareerlutik atsiorpaat.

Tamatuma kingorna Rasmus Lyberth akunniliilluni appisimaarpoq.

Múte B. Egedep Naalakkersuisunut ilaasortat nutaat saqqummiuppaat. Inuit Ataqatigiit arfineq-pingasunik Nalerarlu marlunnik naalakkersuisuutitaqarnissaat partiit taakku marluk isumaqatigiissutigaat. Naleraq Inatsisartuni aamma siulittaasuutitaqassaaq.

Naleqqap siulittaasua, Hans Enoksen Inatsisartunut siulittaasunngussaaq.

Assi © : KNR / Marie Kuitse Kristensen

Assi: Naalakkersuisunut ilaasortanngortut.

Naalakkersuisunut ilaasortassat saqqummersinneqarnerisa kingorna Inuit Ataqatigiit naggasiutaasumik oqaaseqarpoq:

- Tamassi ullumikkut peqataasinnaagassi qujanaq, anersaakkut immerneqarnissarput uani saqqummiussinermi, ilisiarititsinermi atsioqatigiinnermilu pingaartissimavarput timi tarnilu ingerlaqatigiikkunik, aatsaat inuiaat peqqissut pilersinneqarsinnaapput. 

Nipilersortartoq, Rasmus Lyberth nalliuttorsiornermut naggasiilluni erinnamik atuivoq.