Imminut toqussimasorigaat
Nunatta eqqartuussisuuneqarfiani unnerluussisussaatitaasup Tobias Bergip timimik toqungasumik assuarnartumik ikkatiginnissimasutut eqqartuussummik sisamanngormat ullaakkut qulingiluanut suliaq aallartinneqarmat saqqummiussisuuvoq.
Taassuma aamma Qaasuitsup eqqartuussiaviani eqqartuussinerup inernera suliallu ingerlanerani uppernarsaatit ilaatigut saqqummippai. Tassani allakkat uppernarsaatit soorlu pinerlussimanerup politiinut kalerriutigineqarnera, toqusumik misissuinermit timillu toqungasup pilanneqarneranit nalunaarusiat eqqartuussissuunerup saqqummiullugit.
AAMMA ATUARUK Angutit marluk toqutsinertik filmiliarigaat
Angut 62-inik ukiulik toqungasoq nassaarineqarmat imminut toqussimasutut Politiinit nalilerneqaqqaarsimasoq saqqummiussinermi aamma unnerluussisussaanerup oqaatigaa. Toqusulli timaanik misissuinermi pilanneqarneranilu pinerluttoqarsimanera pasitsaanneqarpoq. Paasiniaasoqarneratigut angutit 32-inik 39-inillu ukiullit toqutsisimasutut pasineqarlutik tigusarineqarput.
Qaasuitsup eqqartuussiviata unnerluunneqartoq ukiuni arfineq-marlunni inissiisarfimmiittussanngortimmagu taassuma suliaq Nunatta eqqartuussisuuneqarfianut suliassanngorteqqippaa, pinngitsuutinneqarnissanilu piumasarigaa illersuisuata Finn Meinelip uppernarsarpaa.
Suliarlu maanna Nunatta eqqartuussisuuneqarfiani ulluni tulliuttuni suliarineqassaaq. Sisamanngornermi toqutsisutut eqqartuunneqartoq pasineqartorlu killisiorneqarput. Tallimanngornermi ilisimannittut apersorneqassapput ataasinngorpallu illersuisup unnerluussisussaatitaanerullu eqqartuussineq naammassissasoq oqaatigaat.
AAMMA ATUARUK Ilulissani toqutsisoqarneranik politiit takunnittunik ujaasipput
AAMMA ATUARUK 33-nik ukiulik Ilulissani toqutsisimasutut unnerluutigineqartoq