Immikkut ilisimasalik: Svend Hardenbergip atorfini atornerluppaa
- Svend Hardenbergip atorfini aqqutigalugu allagaatinik takunninnissamik piumasaqaateqartoqarneranik ilisimasaqarnini atornerluppaa.
Isornartorsiuineq taama sakkortutigisoq AG-mi ullumi saqqummersumi atuarneqarsinnaavoq. Tusagassiinermut tunngatillugu inatsisileritooq pisortanilu ingerlatsinermik Danmarkimi immikkut ilisimasaqarnerpaaq Oluf Jørgensen AG-p oqaloqatigisimavaa.
AG, Radioaviisituulli, Svend Hardenbergip Nukissiorfinni suliunnaarneranut pissutsit tunuliaqutaasut pillugit allagaatinik takunninnissamik piumasaqaateqarsimavoq. Tassanili atorfeqarunnaarneranut pissutaasut Svend Hardenbergip nassuiaataanit allaanerungaarput.
Allagaatinik takunninnissamik piumasaqaatit suli akineqanngitsut Svend Hardenbergip Sermitsiaq.ag-mi allaaserineqarnera illuinnaasiortupilussuaq Radioaviisimit AG-miillu eqqumiigiineqarsimavoq.
Taamatut iliortoqarsimanera Oluf Jørgensenip AG-mi ima oqaaseqarfigaa:
- Pisortani ingerlatsinermut inatsimmi allagaatinik takunninnissamik piumasaqaateqarnermut malittarisassat pissutsinik pingaarutilinnik ilumoortunik innuttaasunut saqqummiussisoqarnissaanik qulakkeerinissamik siunertaqarput. Atorfilittap taama qaffasitsigisumi inissisimasup, allagaatinik takunninnissamik piumasaqaatit suliarineqarnerini, tusagassiuutini eqqartorneqarnissaminik taamatut sunniininiarsimanera nalinginnaanngitsuuvoq, Oluf Jørgensen AG-mut oqarpoq.
