Immikkut ilisimasalik nunatta milliardinik atornissaa pillugu: Immikkut ittumik pisoqarfiuvoq
Immikkut ittumik pisoqarmat immikkut ittumik iliuuseqartoqartariaqarpoq.
Aningaasaqarnermut Siunnersuisoqatigiit siulittaasuat, Torben M. Andersen politikerit nunanit allanit 2,5 milliardit koruunit tikillugit atornissamut periarfissanik misissuinerat Naalakkersuisunit nalunaaruteqarneq pillugu taama oqarpoq.
Naalakkersuisut oqarnerat naapertorlugu atorneq coronap ajornartorsiortitsinerani nunatta aningaasaqarneranut qulakkeerutaaqataassaaq.
- 2,5 milliardit aningaasarpassuupput, coronalli ajornartorsiortitsinera suli ilungersunarnerulissagaluarpat Kalaallit Nunaata karsianit akiliisinnaassuseqarnissamut upalungaarsimanertut tamanna eqqarsaatigineqartariaqarpoq. Naalakkersuisut taamaalillutik tigoraannarnik naammattunik aningaasassaaruteriataassanngillat, Torben M. Andersen KNR-imut oqarpoq.
AAMMA ATUARUK Coronavirusi Europami aningaasarsiornermut sunniuteqaqisoq
Torben M. Andersenip, Aarhus Universitetimi ulluinnarnianingaasaqarnermut professoriusup, atorniarnissamut isuma Naalakkersuisunit pisariaqartumik suliniutitut isigaa.
Tassaapput nunap imaluunniit suliffeqarfiup aningaasaqarnerata qanoq inneranik aamma pisinissamut akilersuuteqarnissamullu naammattunik aningaasateqarneranut nassuiaat.
Tigusiffik: E-conomic.dk
Professorip oqarnera naapertorlugu tamanna aningaasaqarnermut tapertaasinnaallunilu inuussutissarsiornermi ikiorsiinissamut periarfissiisinnaavoq, taamaalilluni ajornartoorneq ajornerulissanani.
- Aamma ileqqaarujussuarsinnaapput, taamaaliornrli aningaasaqarnermut aamma eqquissaaq. Pisortat suliffeqarfiini atorfilippassuit soraarsinneqartariaqassapput namminersorlutillu pisiniarfiit Namminersorlutik Oqartussat imissutaannik taamaatitsiinnartariaqassapput. Tamanna ajornartorsiutinut annerulersitsissaaq naggaterpiaanilu Kalaallit Nunaannut suli akisunerulersitsiinnaalluni, professori oqarpoq.
Anignaasaqarnermut Naalakkersuisup, Vittus Qujaukitsup (NQ) pisortat suliffeqarfiini sulisut coronap ajornartorsiortitsinerani suliffimminik annaanissaa ernummatigissanngikkaat, KNR-imit allami apersorneqarnermini oqaatigaa.
Akiitsukinnerup aningaasartuutit ikinnerusitsissagai
Aningaasarpassuarnik atorneq aningaasartuuteqarfiusarpoq, nunattali akiitsui 230-250 millionit koruunit missaanniittut nunanut allanut soorlu Europap kujataaniittunut sanilliullugit ikittut, Torben M. Andersen nassuiaavoq.
Aningaasarpassuarnik atorneranni tamanna akikinnerusitsisinnaavoq.
- Aningaasarissaarnermi atorniarneq akikinnerusarpoq. Akiligassarpassuaqaraanni akiitsunut ernianullu akiliisinnaaneq apeqquserneqartarpoq, taamaalillunilu aningaasartuutaanerulertarluni, Torben M. Andersen oqarpoq.
AAMMA ATUARUK Air Greenlandip pisortaa: Apriili maajilu martsimit ajornerussapput
Atukkalli erniaqartinneqarnissaat akilerneqarnissaallu tamatumannga allanngortinneqanngilaq, taamaammat siunissami akilersuisoqartussanngussaaq.
Matumani nunarput Namminersorlutik Oqartussat pigisaannik qassiisunik suliffeqarfiuteqartoq eqqaavaa, assersuutigalugu Air Greenland. Taakku taperserneqartariaqarpata taava Namminersorlutik Oqartussat aningaasaatinik amigartooruteqarnermut ikiuisussaapput, tamannalu aamma aningaasartuutaangaatsiarsinnaavoq.
