Air Greenlandip pisortaa: Apriili maajilu martsimit ajornerussapput

Ilaasut amerlassusaat kaaviiaartitallu ikipput, Air Greenlandip aningaasaliinissani nukiginnartuunngitsut tamaasa coronap ajornartorsiortitsinerani unitsikkallarpai.

Nunatta naatsorsueqqissaartarfianit kisitsisit naapertorlugit nunatsinniit nunanut allanut timmisartuussivinnit arfinilinnit 2020-mi ukiup sisamararterutaani siullermi ilaasut siorna piffissamut tassunga sanilliullugit 12,7 procentimik ikilisimapput.

AAMMA ATUARUK Coronakrise: Air Greenland lukker ruter og aflyser afgange

Tamatuma ilaasartut 1621-nik ikilinerisa nalingaa. Naatsorsueqqissaartarfiup tamanna angalaqqusaannginnermik, marsip ulluisa 21-anni atuutilersumik, pingaartumik pissuteqarnerarpaa. Timmisartoqqusiunnarnerup malitsigisaanik Air Greenlandip ilaasartuni siorna piffissamut tassunga sanilliullugit 2.166-inik ikilisut nalaappaa.

- Siornamut sanilliullugu COVID-19-ip uatsinnut eqquinnginnerani siuarsimanerugaluarpugut, taamaammat ukiup ilaani ingerlalluarnerunissarput naatsorsugileraluarparput, Air Greenlandip pisortaa, Jacob Nitter Sørensen oqarpoq.

- Corona ajornartorsiortitsilermat pisortallu angalaqqusiunnaarmata ilaasartugut soorunami ikileriarpiloorput.

Kaaviiaartitani annaasaqangaatsiartoq

Pisortap oqarnera naapertorlugu kaaviiaartitat 80-85 procentinik ikilipput. Coronap ajornartorsiortitsinera timmisartuusseqqusinnginnerlu taamaalillutik Air Greenlandip piffinnut nutaanut naleqqussartariaqarneranik kinguneqarput.

Taamaammat qarasaasiani atortunik taarsersuinisssaq, taartissaatisinissaq, siunnersuisunik atuineq, ilinniartitsineq aningaasaliinissallu pinasuanngitsut unitsikkallarneqarput.

AAMMA ATUARUK Coronakrise: Air Greenland lukker ruter og aflyser afgange

Aammattaaq suliaqarpallaannginnermut naleqqussaniarluni sulisunut ilaatigut akissarsiassanik uninngatitsigallarnissamut sulinngiffeqartitsigallarnisamik isumaqatigiissuteqartoqarpoq

- Apriili maajilu marsimit ajornarunissaat qularnanngilaq, Jacob Nitter Sørensen oqarpoq, itisiliillunilu:

- Inuit aasaanerani angalanissaminnut piffissami tassani inniminniikkajupput. Taamaammat qaammatini taakkunani kaaviiaartitassatsinnik annaasaqangaatsiassaagut, tamannalu ukiup sinneranut sunniuteqassaaq nunanummi allanut timmisartuussinerit qaqugu ammaqqinneqarnissaat ilisimanngilarput. Taamaammat inuit aasaanerani sulinngiffeqarnissaminnut aamma inniminniinissartik tunuarsimaarfigaat.

Takornariaqarneq ilungersunartorsiortoq

Timmisartuusseqqusaannginneq tamatumalu nassatarisaanik timmisartuni ilaasukinnerunera Visit Greenlandimit aamma malugineqarsinnaavoq.

- Inuussutissarsiornermut tamarmut aningaasartuutaangaatsiarpoq, Julia Pars oqarpoq.

- Inuussutissarsiut suli ineriartortuuvoq, taamaammat piffissami matumani coronap ajornartorsiortitsilernera aallarnisaasutsinnut suliffeqarfinnullu nutaanut suliffeqarfinnullumi pilersinneqareersunut allaat ajornartorsiortitsivoq, Julia Pars oqarpoq.

AAMMA ATUARUK Millionerpassuarnik annaasaqartoq: Timmisartuusseqqusaannginneq Air Greenlandimut annaasaqaataasoq

Nunatsinni nunatsinniillu timmisartumik angallannerit tamarmik takornarianut marsip ulluisa 21-anni matuneqarput.

Julia Parsip oqarnera naapertorlugu takornarianut juunip aallaqqaataanit ammaaqqittoqassanersoq suli nalorninartorpassuupput.

- Naak ammaqinnissarput sulinittalu aallarteqqinnissaa kissaatigigaluaripput peqqinnissarput isumannaatsuunissarpullu suli eqqarsaatissaapput. Takornariartorisartakkatta suminngaanneerfigisaanni suli tunillanneqarsimasorpassuupput. Taamaammat coronamik tunillanneqarsimasorpassuaqalerumanata nunatsinnik illersuinerup takornariaqarnermillu iluanaaruteqarnissaq naligiissaarniarneqarput, Julia Pars oqarpoq.

Nammineq nunagisanni sulinngiffeqarlutit angalagit

Coronap ajornartorsiortitsinerata kingunerisaanik Visit Greenland nunatta iluani takornariarnissamut pilerisaarusiuleruttorpoq. Ussassaarinermi nammineq nunagisami takornariarsinnaaneq sammineqassaaq, Julia Parsillu nammineq oqarneratut ”nunattta teqeqqui alutornartut misigineqarsinnaaqullugu”.

- Visit Greenlandimi nunatsinni sumiiffinnik takusasanngortitsiniarneq sungiusimavarput, taamaammat nutaanik pilersitsiniarnermut suleqatiginnittoqarumanissaa neriuutigaarput. Uagummi pilersitsisuussanngilagut, takusassanngortitsissaagulli, Julia Pars oqarpoq.

Air Greenlandip tungaaniit Jacob Nitter Sørensenip innuttaasut nammineq nunagisami sulinngiffeqarlutik angalanissaat aamma kaammattuutigaa.

- Tamanna inuussitissarsiornermik aallartitseqqilluniluinuussutissarsiornermut tapersiissutaasinnaavoq, taanna oqarpoq.