Immikkut ilisimasalik: Kalaallit kinaassutsimik toqqaasariaqarput
Kalaallit Nunaat nunarsuarmioqataalernermini nunatullu namminersortutut isigineqarusunnermini avammut kiinnertarnissaminik ajornartorsiorluarsinnaakutsoorpoq, ajornartorsiullu tamanna anneruliinnarsinnaavortaaq. Tassalu tamanna kalaallinit qangali oqallisigineqartariaqarsimagaluartoq.
- Tunngaviusumik namminerisamik inatsiseqalernissaq Danmarkimut atanerinnarmik aallaaveqassanngilaq aammali pingaaruteqarluinnarluni inuiaqatigiittut imminut isiginermik.
- Kalaallit Nunaata pisariaqartippaa, nunap inoqqaavisut imminnut isiginerup nunarsuarmioqataasutullu namminersortutut isigisaalernissap, politikki aningaasarsiornerlu eqqarsaatigalugit ataqatigiissitsinissaq, taama naqissusiivoq ph.d. aamma Copenhagen Business Schoolimi lektori, Jeppe Strandbjerg. Taassuma aamma suliarisarpai nunani issittuni politikkikkut soqutigisat.
- Ileqqutoqqat malillugit pisinnaatitaaffiit, soorlu Naalagaaffiit Peqatigiit inatsisaanni nunat inoqqaavi pillugit allassimasut aammalu nunarsuatsinni suliffeqarfissuit soqutigisaat assilillugit Kalaallit Nunaanni iliortoqalissagaluarpat, tamanna aporaannertut oqaatigineqarsinnaalluarpoq. Taamaattumik pingaaruteqarpoq pinngitsoorneqarsinnaananilu tunngavioqqissaartumik Kalaallit Nunaanni innuttaasut akornanni oqallittoqarnissaa, Jeppe Strandbjerg oqarpoq. Aporaassutaasinnaasut ilaattut taavaa, nunamik piginnittussaatitaaneq.
- Assersuutaalluarsinnaavoq, soorlu nunarsuatsinni sumiiffiit amerlanersaanni inuinnaat nuna pigisarisarpaat. Tamanna Kalaallit Nunaanni atuutsinneqanngilaq. Tamanna kalaallinit ippinnartutut isigineqanngitsoq nunat allamiut ippinnartittarpat paasisinnaanagulu, aammalu nunarsuarmiut allat ilisimanngilaat Kalaallit Nunaanni nuna inuinnarnit pigineqarsinnaanngimmat, Jeppe Strandbjerg oqarpoq, assersuutigalugulu eqqaallugu, ukiut arlalialuit matuma siorna, Kalaallit Nunaata ilaani ujaqqanik soqutigisallit, aatsitassarsioqatigiinnit, True North Gemsimit katerseqqusaajunnaarmata.
Tassalu tamanna avissaartuutsitsilersinnaasoq: Naalagaaffiit Peqatigiit aalajangersagaat, nunap inoqqaavinut tunngasoq qanoq pimoorunneqartigissava aamma nunarsuarmioqatigiit aningaasaqarnerat eqqarsaatigalugu aammalu nunamik piginnittussaatitaaneq eqqarsaatigalugu Kalaallit Nunaat sumi inissisimassava? Tassalu tamakkorpiaapput Kalaallit akunnerminni oqallisigisassaat, tassalu tamannarpiaavoq oqallisigineqartariaqartoq, Jeppe Stranbjerg naqissusiivoq.
- Kalaallit Nunaanni innuttaasut inooriaasiat aammalu aningaasarsiornissaq eqqarsaatigalugit, tamanna kalaallinit assigiinngitsunik isummersorfigineqarsinnaalluarpoq. Tassaavorlu tamanna ulorianartutut oqaatigineqarsinnaasoq. Taamaattumik isumaqarpunga oqallinneq pingaartinneqarnerusariaqartoq, nunarsuarmiut allat suliffisuaqarneri assigalugit Kalaallit Nunaat iliulissagaluarpat tamanna qanoq ingerlanneqarsinnaanersoq oqallisigalugu, Jeppe Strandberg oqarpoq.
