Immikkut akuersissummik peqqaaratik naajanik toqoraasut

Naajarpassuit Kommune Kujallermi ippassaq toqorarneqalerput, Namminersorlutilli Oqartussaniit akuersissummik peqqaarani toqoraasoqarsimavoq. Amalie Jessen, Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq taama oqarpoq.
Allattoq Mads Lynge
januaarip 20-at 2012 17:05

Sakkut aallaasillu aalajangersimasut atornagit timmiarniartoqassappat, Timmissat illersorneqarnerat piniagaanerallu pillugit Namminersorlutik Oqartussat nalunaarutaat 2009-meersoq naapertorlugu immikkut ittumik akuersissuteqartoqartariaqarpoq, suliamili matumani Kommune Kujalliup pullatit narajalersukkat atorsimavai, nerisassat pisiniarfinnit igitassat atorneqarsimammata.

Naajat pullatinut ajornaquteqanngitsumik pulasinnaapput, sulukkaajunnertillu pissutigalugu anillassinnaajunnaartarlutik.

- Pullatit siulliit ullaaq nalunaaqutaq qulingiluat missaanni ilineqarput nalunaaqutarlu aqqaninngormat naajat 52-it toqunneqareersimapput, Kommune Kujallermi pisuussutinik uumassusilinnik nakkutilliisoq Otto Kielsen, KNR-imut Nanortalimmiit ippassaq oqarpoq.

Immikkut ittumik akuersissummik piniaqqaarani naajanik toqoraasoqarsimasoq, Kommune Kujallermi Teknikkeqarnermut, Ineqarnermut Avatangiisinullu Ingerlatsivimmi Teknikkeqarnermut pisortaq Jan Kjær KNR-imut oqarpoq.

Naakkittaatsuliorlunili naajanik toqoraasoqassanngippat aatsaat akuersissuteqarsimasoq, Aalisarnermut Piniarnermullu Aqutsisoqarfimmi pisortap Emanuel Rosingip oqaatigaa.

Emanuel Rosingili Radioaviisimit attaveqarfigigatsigu annertunerusumik oqaaseqarumanngilaq, Aalisarnermullu Piniarnermullu Naalakkersuisoqarfimmi allaffimmi pisortamut Amalie Jessenimut innersuussisoqarluni.

Taassumalli KNR-imut siornatigut oqaatigaa immikkut ittumik akuersissummik tunniussisoqarsimanngitsoq. Amalie Jessen KNR-imit attaveqarfigeqqinniaraluaratsigu iluatsinngilarput.

Timmissat illersorneqarnerat piniagaanerallu pillugu nalunaarummi paragraf 21 naapertorlugu immikkut ittumik akuersissummik tunniussisoqarsinnaavoq, peqqissuunissamik, ilisimatusarnermik atuartitsinermillu siunertanut kiisalu attaveqaqatigiinnik pissutsit aamma timmisartukkut angallannerup isumannaatsuunissaa qulakkeerneqarsinnaappata.