Immikkut ilisimasalik: Imeq Camp Centurymeersoq uloriananngilaq

- Qinngualanernik radioaktiviusunik akulinnik annikittuararsuarnik tasamaniittoqarpoq. Taamaattumik uanga ernumassanngikkaluarpunga.

Risømi misiligaaffiusimasumi Danmarkimilu DTU-mi professoriusimasoq atomfysikere maanna 89-nik ukiulik Povl Ølgaard taama oqarpoq.

Naak qeeqalersimagaluarluni pensionisiaqaleraluarsimallunilu Camp Century suli eqqaamavaa.

Taassuma nalornisiginngilaa atomimik nukissiorfiup Sermersuarmiittup imeq atortukua qinngualanernik ulorianartunik akulik,  danskit naalakkersuisuisa 1960-imi USA Sermersuarmut eqqaasinnaaneranik akuerimmagu akisussaassusilittut iliornerusimasoq.

- Sermimut kuineqaruni piffissaq sivisoorujussuaq atorlugu Thulemut anngunniarsarissaaq. Sermillu iluaniittoq arlaannaannulluunniit paamisaarutaanngilaq. Qinngualanerit tassanngaanneersut sermip qaaniit isumaqarpunga uuttortarneqarsinnaanngittut.

Avatangiisit pillugit ernumassutissaqanngilaq

Povl Ølgaard Danmarkimilu Atomenergikommissionimi allatsi Chr. Thomsen 1959-imi Washington DC-miipput atomimik nukissiorfik inerikkiartortitaq Sermersuarmi Camp Canturymi amerikamiut ivertikkusutaat takuniarlugu.

- Tassami sunik takorluugaqarnersut takorusukkatsigu. Ernumassutissaqassanerluta. Taamatut takorluugaqarsimanngikkaluarpunga, amerikamiut namminneq nunaminni qularisaminnik sanajunnanngimmata. Qularisimagunikkumi aamma Sermersuarmi sananavianngillat.

Povl Ølgaardip ulloq manna tikillugu nalornisiginnginnerarpaa erngup eqqartorneqartup uumasut inuilluunniit ulorianartorsiortinngikkai.

Taamaattumik Camp Century ammaqqillugu avatangiisinut ulorianartunik ujaasinissaq isumaqatiginngilaa.

- Uninngatiinnarneqartariaqarput. Qallornissaa asuleernerussaaq aningaasarpassuarnillu akeqarluni. Qinngualanerit ulorianartut tassaniittut annikittuararsuupput, taamaattumik uanga aarlerissanngikkaluarpunga.