Imigassat sivisunerusumik ammasalissagunarput
![](/sites/default/files/styles/image_934x467/public/article_images/alkohol.jpg?itok=ey4jQuPG)
Tassami Siumumeersup Malik Berthelsenip imigassat ammasarfiisa sivitsorneqarnissaannik siunnersuutaa, Inatsisartuni amerlanerussuteqarluartut tapersersorpaat.
Inatsisartut ippassaq ataatsimiinneranni tamanna paasinarsisoq nittartakkami Sermitsiaq.ag-mi allaaserineqarpoq.
Siumut, Demokraatit aamma Atassut imigassaarniarnermi killilersuinernut akerliupput, partiillu taakku pingasut, inuit imigassamik atuinerminni aqutsisinnaanermik ajornartorsiuteqartut, imigassamik isiginninnerminnik allanngortitsinissaat suliniutigerusuppaat.
Inuit Ataqatigiit aamma Kattusseqatigiit Partiiata imigassat pisiniarfinni ammasarfiisa arfininngornikkut sivitsorneqarnissaat isumaqataaffigaat, tassa nalunaaqutaq ataatsimut matusarnerat sivitsorlugu aatsaat arfinermut matusalersillugit, taamaattorli partiit taakku marluk immiaaqqat, viinnit imigassallu kimittuut pisiniarfinni sapaammi ammasarnissaat akerleraat.
Inatsisartut imigassaq pillugu oqallinneranni, nalunaaquttap akunnerini marlunni sivisussusilimmi, IA-kkut siunnersuummut akuersaannginnerat malunnarpoq.
Olga P. Berthelsenip, aamma peqqissutsimut naalakkersuisup Agathe Fontainip, imigassat ammasarfiisa sivitsorneqarnerisigut imigassamik atuinikinnerulersoqarnissaa ilimaginngilaat.
Malik Berthelsenip siunnersuuteqarneratigut, naalakkersuisut inatsisartut inatsisaannik 2000-imeersumik allanngortitsinissaannik kinguneqarataannaasoq, aappassaanneerneqannginnermini Inatsisartut Ilaqutariinnermut Peqqissutsimullu ataatsimiititaliaanut ingerlateqqinneqarpoq, maajillu 16-ianni aappassaanneerlugu oqaluuserineqassasoq, nittartakkami Sermitsiaq.ag-mi allaaserineqarpoq.