Imigassat ammarsarfii siusinnerpaamik aappaagu sivitsorneqassapput
![](/sites/default/files/styles/image_934x467/public/article_images/vin_630_5.jpg?itok=JoakmhFx)
Malik Berthelsenip Siumumeersup niuertarfiit sivisunerusumik imigassaarniarsinnaanissaat pillugu siunnersuutaa ilalerneqarpoq. Naalakkersuisulli ammasarfiit sivitsorneqarnissaat pillugu tigussaasumik siunnersuuteqarnissaat qaammaterpassuit qaangiuppata aatsaat pisinnaassaaq.
Naalakkersuisut siunnersuutip ingerlateqqinnissaanik suliakkerneqarnissaat Malik Berthelsenip siunnersuutigaa, tamannalu akuerineqarpoq. Taamaammat Naalakkersuisut siunnersuutaat akuerineqareerpat aatsaat ammasarfinnik sivitsuineq atuutilersinneqarsinnaavoq.
Malik Berthelsenip siunnersuutimi suliarineqarnera utaqqikatallugu siunnersuummut tunngatillugu killiffimmik ujartuilluni paragraf 37 tunngavigalugu apeqquteqaateqarpoq.
Inatsisissamik suliaqarnermi suleriaatsit aalajangersimasut malinneqartussaapput, tamannalu sivisusinnaasarpoq, Peqqissutsimut naalakkersuisoq Agathe Fontain oqarpoq.
Imigassanik aalakoornartortalinnik tuniniaaneq sassaalliinerlu pillugit Inatsisartut inatsisaannik allanngortitsinissamik siunnersuutip akuerisassanngorlugu Inatsisartunut saqqummiunnissaa taamaasilluni siusinnerpaamik ukiakkut ataatsimiinnermi pisinnaavoq, Agathe Fontain oqarpoq.