Kommune Qeqertalimmi imigassanik aalakoornartutalinnik maanna aamma inerteqquteqartoqalersoq
Kommune Qeqertalimmi kommunalbestyrelse immikkut ittumik ataatsimiissimavoq, tamatumalu kingorna aalajangiisoqarpoq ukioq manna januaarip ulluisa 27-anni unnuap-qeqqaniit ukioq manna februaarip ulluisa qulingiluaannut Kommune Qeqertalimmi illoqarfiit nunaqarfiillu tamarmik imigassanik aalakoornartortalinnik nioqquteqarneq imigassartortitsinermullu inerteqquteqarallarnissamik Naalakkersuisunut piumasaqartoqassasoq.
Qinnuteqaatillu taakku akuerineqarput, unnuarlu unnuap qeqqaniit februaarip ulluisa qulingiluaata tungaanut ilanngullugu atuutilissallutik.
Nunatsinni tamarmi tamanit iserfigineqarsinnaasuni coronapas atuutissaaq.
Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit:
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit.
Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Naalakkersuisut nittartagaanni tamanna atuarneqarsinnaavoq.
Kommune Qeqertalik nunatsinni kommunit taama inerteqquteqarallalersut sisamassaraat.
Qeqqata Kommuniani imigassamik aalakoornartortalimmik nioqquteqarneq sassaallersinnaanerlu februaarip aallaqqaataata tungaanut inerteqqutigineqarallarpoq, Kommuneqarfik Sermersuumilu Kommune Kujallermilu tamanna februaarip qulingiluaata tungaanut atuulluni.
Angerlarsimaffinni ernguttarnerit coronavirusip tuniluunnerusinnaaneranut pissutaaqataasinnaasut Kommune Qeqertalimmi kommunalbestyrelsi kommunini allani kommunalbestyrelsit assigalugit isumaqarpoq, peqqinnissaqarfimmi artukkerneqarsinnaasorigamikku, politiillu nukippassuarnik atuisariaqarnerannik aamma kinguneqartarsorigamikku.
- Fiisterneq amerlanertigut Peqqinnissaqarfimmut aamma politiinut nukinnik atuingaatsiartarpoq suliassanillu arlalinnik kinguneqartarpoq, taakkulu imigassartorpallaarnermik tunngaveqartarlutik, Naalakkersuisut tusagassiuutinut nalunaarummi allapput.
AAMMA ATUARUK Unnuap qeqqanit atuutilissasoq: Kommunini pingasuni imigassamik inerteqquteqarneq
Angerlarsimaffinni eqqissiviilliornerit, nakuuserniarnerit, imigassartorsimallunilu biilinik ingerlatsinerit ajornartorsiutinut ilaapput.
Avannaata Kommunia nunatsinni kommunini kisiartaalluni maanna imigassanik aalakoornartutalinnik nioqquteqarnermut sassaalliuteqarsinnaanermillu inerteqquteqarallarnissamik suli atuutilersitsinikuunngilaq.
- Massakkut matusissagaluarutta ajornartorsiut kingusinnerusumut illikartiinnartussaavarput, taamaattumik matusinissaq aqqutissaanngitsutut aalajangernikuuarput, Avannaata Kommuniani borgmesteri Palle Jerimiassen KNR-imut ippassaq oqarpoq, nangillunilu:
- Maani Ilulissani Upernavimmilu corona annertuumik atoreernikuuarput. Taamanikkullu aamma takuarput innuttaasut namminneq akisussaaffimmik tigusillutik ingerlassinnaasimavaat.
Naalakkersuisut nuna tamakkerlugu corona pillugu killilersuutinik arlalinnik marlunngormat atuutilersitsipput, taakkulu februaarip ulluisa 14-iata tungaanut atuutissapput.
Malittarisasat ilaattut nunatsinni tamarmi coronapas takutinneqartassaaq tamanillu isersifigineqarsinnaasuni qanermut assiaqut atorneqassalluni.