Imigassamik ikiaroornartumillu akiuiniarnermi suliniut nutaaq pitsaanerlu
Else Poulsen, tarnip pissusiinik ilisimatuutut ilinniarsimasoq Nuummilu Nuna Tamakkerlugu Ilitsersuisarfimmi aqutsisoq, Imigassaq Ikiaroornartullu pillugit Siunnersuisooqatigiinni siulittaasunngortussanngorpoq.
Helga Andersen Iversen, katsorsaasutut ilinniarsimasoq, Nuummi Kofoed Skole-mi atorfeqartoq,
siulittaasup tulliattut inissippoq.
Fakta om Alkohol- og narkotikarådet
Imigassaq Ikiaroornartullu pillugit Siunnersuisooqatigiit pinaveersaartitsinermut, peqqinnerulersitsiniarnermut, nakkutiginninnermut aamma katsorsaanermut tunngasuni siunnersuisartuupput. Siunnersuisoqatigiit imigassamik, ikiaroornartunik, aningaasanoorajunnermillu atornerluinermik katsorsaanermi ineriartorneq malinnaavigaat. Siunnersuisooqatigiit Naalakkersuisunut Naalakkersuisoqarfinnullu siunnersuisartuupput ilaatigullu atornerluinerup iluani anguniagassanik suliniutissanillu siunnersuisarlutik.
Siunnersuisooqatigiit qulingiluanik ilaasortaqarput. Suliamut ilisimasalittut tallimaasut sinniisuutitat nunatsinni nakorsaaneqarfimminngaanneerpoq, politiininngaanneerpoq, KANUKOKA-minngaanneerpoq naalakkersuisoqarfimminngaanneerlunilu. Sinneri Peqqissutsimut Naalakkersuisumit toqqarneqarput meeqqanik inuusuttunillu, timersornermik, aningaasanoorajunnermik atornerluinermillu katsorsaanermik aallartitaallutik.
Siunnersuisooqatigiit atornerluineq pinaveersaartitsinerlu pillugit suleqatigiinnermi
Peqqissutsimut Naalakkersuisup Agathe Fontainip pingaaruteqarnerarpai toqqaanermilu
Kalaallit Nunatsinni imertariaaseq naleqqutinngitsoq taakkartorlugu:
- Qanoq imertariaaseqarnerput pillugu eqqarsalersitsiniarluta ataatsimoorluta suleqatigiissaagut. Inersimasut ataasiakkaarlutik nassuerutigisariaqarpaat kingunerlutsitsisinnaasumik piffissami sivikitsumi sukkasuumik imerpallaarnermi kamalertarlutalu silaaruttartugut, Agathe Fontain taama oqarpoq.
Tamanna nassuerutigeqqaarlugu aatsaat pineqartup imertariaatsini allanngortinnissaanut periarfissaqalissaaq. Meeqqat inersimasut qanoq imertariaaseqarnersut takusarpaat, meeqqallu inersimasutut iliuuseqartarput.
Inuttut ataasiakkaarluta atornerluinerup unitsinnissaanut akisussaaqataavugut. Peqqissutsimut naalakkersuisoq, Agathe Fontain tusagassiuutinut taama nalunaarummini allappoq.
Agathe Fontainip suliffeqarfiit tamaasa aamma kaammattorpai aanngaajaarniutit pillugit politikkeqaleqqullugit aammalu ataatsimoortariaatsimik allanngueqqullugit, taamaalilluni imigassaq ataatsimoornermi qitiujunnaarniassammat.
