Marloriaammik qularnaveeqqusiisarneq atorunnaarpoq: Imeruersaatit immiaaqqallu akikillissapput
Kalaallit Nunaanni marloriaammik qularnaveeqqusiisoqassaarpoq.
Imeruersaatit immiaaqqallu taamaalillutik akikillissapput.
– Akit appassavagut. Nuannaarutigisorujussuuarput taama kiisami iluatsinnera, sivisoorujussuarmik sulissutigineqarnikuummat taanna, Brugsenip aninigaasaqarnermut pisortaa Malene Broberg oqarpoq.
Kalaallit Nunaanni pisiniarfiit juulip aallaqqaataata tungaanut marloriaammik qularnaveeqqusiisaraluarput.
– Kalaallit Nunaanni pisiniarfiit atuisullu imeruersaatit Danmarkimeersut puukuinik utertitsinissamut nalunaaqutsersimasunik pisigaangamik Danmarkimut Nunatsinnullu puukunik utertitsinissamut qularnaveeqqutinik tamanik akiliisarunnaassapput, Avatangiisinut Pinngortitamullu Naalakkersuisoqarfiup juunip 30-anni nalunaarutaani allassimavoq.
Akit naligeeqqinnaamik appassapput
Marloriaammik qularnaveeqqusiissaarneq atuisunut qanorpiaq iluaqutaassanersoq, Malene Broberg-ip ima nassuiarpaa:
– Akip apparnera maleqqissaassavarput. Soorlu qularnaveeqqusiineq 80 øremik apparpat, taava akia 80 øremik appassavarput. Apeqqutaatillugit nioqqutissat sorliunersut assigiinngitsorujussuupput. Ilai 80 øre-upput, ilai 2 koruunit 40 øre-llu. Puiaasap qillertuusallu angissusaa apeqqutaatillugu.
Pissusissamisuuginnarpoq
Marloriaammik qularnaveeqqusiisarnerup atorunnaarsinniarneqarnera pissusissamisuuginnartutut Atassutip isigaa:
– Pissusissamisuuginnarpoq nunatsinni atuisut marloriarlutik qularnaveeqqusiissut akilertassanngikkaat. Atassummiillu iluarsiissutissamik noqqaasimavugut, nuannaarutigaarpullu danskit avatangiisinut naalakkersuisuat uagullu naalakkersuisugut suleqatigiilluarlutik piviusunngortikkaat, Atassutip siulittaasua Aqqalu C. Jerimiassen oqarpoq.
– Angusaqarnerup takutiinnarpaa naalagaaffeqatigiinnermi pitsaasumik suleqatigiittoqarsinnaasoq. Toqqaannartumik pitsannguutaassaaq, uagullu suliassaraarput suleqatigiinnermi allanik assingusinnaasunik aporfiusartunut aaqqiissutissanik ujartuinissaq, aningaasaqarnitsinnut pitsanngoriaataasussanik, Aqqalu C. Jerimiassen oqarpoq.
