Imeruersaatinik eqeernartulinnik imernak imertorit
Atuarfiit, inuusuttuaqqallu ilinniarfigisaat ulluni makkunani imeruersaatit eqeernartortallit pillugit paasissutissanik agguaaffigineqarput. Imeruersaatit eqeernartortallit meeqqanit imerneqarlutik kinguneqarnerlussinnaapput, ilaatigut sinnarlutitsisinnaallutik. Taamaattumillu imerfiit, postkortit quppersagaaqqallu imeruersaatit eqeernartortallit pillugit paasissutissanik allagartallit agguaanneqarput.
-Paasissutissanik taama agguaasoqarnerani imerusersaatit eqeernartortallit meeqqanut inuusuttunullu peqqinnannginnerat oqariartuutigaara. Anguniagaavorlu angajoqqaat meeqqallu tamatuminnga ilisimasaqalernissaat. Meeqqammi inuusuttullu imeruersaatinik eqeernartortalinnik annertuumik imigaqarnerat peqqinnanngilaq, kinguneqarnerlussinnaallunilu, Peqqinnissamut Naalakkersuisoq Agathe Fontain taama oqarpoq.
Imeruersaatit eqeernartortallit pillugit paasissutissat:
Imeruersaatit eqeernartortallit koffeini 80 mg liiterip sisamararterutaani akugigajuttarpaat. Eqeernartunik taaneqartaraluarlutik sodavandip sukkoqarneranik ilaatigut pitsaanerunngillat. Nioqqutigineqarput eqeernartuunerarlugillu ilaatigut koffeinimik, taurinimik,glucoronolactoninillu akoqarneri pillugit.Imeruersaatillu taamaattut arlallit vitamin B6 B12-llu akorigajuttarpaat.
Koffeini kaffini tiini, kakaonilu akuusartoq eqeersitsisinnaasutut ilisimaneqarpoq.
Taurini nalinginnaasumik neqini, aalisakkani, imarmiunilu allani nerisaqarnermi timimut iluaqutaasussatut pineqartarpoq.
Glucoronolactonilu naliginnaasumik aqajaqqumut atorfissaqartarpoq, eqqaamaniarnermullu kiisalu tiguartilluni sulisinnaanermut sunniuteqartarluni.
Meqqat inuusuttuaqqallu ullormut koffeinimik 2,5 mg annertunerusumik pinissaat peqqinnanngilaq. Meerarlu 40 kg-lunik oqimaassuseqaruni annerpaamik 100 mg koffeinimik pisinnaavoq. Tassalu imeruersaatini koffeini tamatuma missaaniikkajuttarpoq. Taamaattumillu manna sulissutaavoq meeqqat imeruersaatinik eqeernartulinnik annertuumik imigaqannginnissaat.
