Imerniartarfiutillip nakkutilliisut naliliinerat isornartorsioraa
Isornartorsiuisoqarneralu peqqissutsimut naalakkersuisoqarfiup oqaaseqarfigerusunngilaa.
Peqqissutsimut naalakkersuisoqarfiup nakkutilliisuisa imigassamut inatsisip Tasiilami unioqqutinneqarsimanera siorna decembarip qaammataata qiteqqunnerani nakkutilliinermit nalunaarusiaminni allaaseraat, tamannalu Sermitsiaq.AG-p sapaatit akunnerata siuliani oqaluttuarineqaraa.
Pingaartumillu imerniartarfiit marluk 'Klubben' aamma 'Diskotek/krostuen' nalunaarusiami sakkortuumik isornartorsiorneqarput, ilaatigut nakkutilliisoqarnerata nalaani ukiukitsunut imigassamik sassaalliuteqarsimanertik imerniartarfimmilu isersimasut tamarmik malunnartumik aalakoornerat pissutigalugu.
AAMMA ATUARUK Imigassamut inatsisip Tasiilami malinneqarnera equngasortaqartoq
Arctic Wonderland Toursip pisortaa, Mike Nicolaisen, 'Diskotek/krostuen'-imik piginnittoq ajornartorsiutit aaqqiissuteqarfiginiarlugit nalunaarusiaq tunngavigalugu suliniutinik arlalinnik aallartisaasimavoq.
Tamatumali peqatigisaanik nalunaarusiap pitsaassusia nakkutilliisullu naliliinerat qularnartoqartippaa, Kommuneqarfik Sermersuumut allagarluni taama allappoq.
- 12-15-inik ukiulinnik issiasoqarnera allaallu "inuit ikinnerpaamik 15-it pineqartut" ilumuunngilluinnarpoq uppernarsaatissartaqanngitsumillu oqalunnerulluni, pisortaq taama allappoq.
Mike Nicolaisenip nalunaarusiaq ilaannakuunerarpaa naliliinerillu piviusorsiunngitsumik naliliinerunerarlugit, aamma nakkutilliisut aallartitaata imerniartarfimmi isersimasut ukiuinik qanorlu aalakoortiginerinik nalilersuinissamut piginnaasai qanoq-ittuunersut apeqqutigaa.
Imerniartarfimmillu piginnittup tamatumunnga atatillugu nakkutilliisunit utoqqatserfigineqarnissani piumasaraa.
AAMMA ATUARUK Fontainip sukateriniarnera tapersissallugu ataatsimiititaliaq piareersimasoq
Nakkutilliisut nalunaarusiaata isornartorsiorneqarnera Peqqissutsimut naalakkersuisoqarfiup KNR-imut oqaaseqarfigerusunngilaa. Suliap imerniartarfiit Kommuneqarfik Sermersuumilu kommunalbestyrelsip akornanni maanna suliassanngornera naalakkersuisoqarfiup pisortaata Tine Parsip innersuussutigaa.
Suliat pineqartut kommunip aningaasaqarnermut inuussutissarsiornermullu ataatsimiititaliaata februaarip arfineq-pingajuani ataatsimiinnermini suliarissavai.