Fontainip sukateriniarnera tapersissallugu ataatsimiititaliaq piareersimasoq
Siunertarineqartoq tamanit isumaqatigineqarpoq; meeqqat inuusuttullu atornerluinermut illersorneqarnissaat. Tamatumunngali sakkuginiarneqartoq oqallisaangaatsiarpoq.
Sulisitsisut peqatigiiffiat, GE, isumaqataanngilaq pisiniarfissuillu Pisiffiup Brugsenillu isornartorsiorpaat tamatumunngalu akerliussutsiminnik takutitsillutik. Inatsisartulli ilaqutariinnermut peqqissutsimullu ataatsimiititaliaanni amerlanerussuteqartut, Siumumeersut Inuit Ataqatigiinneersullu, Naalakkersuisut imigassaq pillugu inatsisissatut siunnersuutaat, ilaatigut imigassamik nioqquteqarnermi ammasarfiit allanngortinnissaannik pisiniarfinnilu assiaqusersuinissamik imaqartoq, taperserpaat.
Ataatsimiititaliaq inatsisissatut siunnersuummut, sapaatit akunnerata tulliani ataasinngorpat aappassaaneerneqartussamut, sisamanngorpallu Inatsisartut ukiaanerani ataatsimiinnerisa ulluanni kingullermi pingajussaaneerneqartussamut isumaliutissiissutimini taama allappoq.
Inatsisissatut siunnersuutip aappassaaneerneqarnissaa sapaatit akunneranni uani pisussaagaluartoq kinguartinneqarpoq, inatsisissatut siunnersuummi pingaartumik paragraf 25 aamma 28, ammasarfinnut pisiniarfinnilu imigassamik qanoq assiaqusersuisoqarnissaanut tunngasut misissorluarnissaat ataatsimiititaliamit kissaatigineqarmat.
AAMMA ATUARUK Imigassaq silaarunnartulik pillugu inatsisissaq kinguartinneqartoq
Naalakkersuisut inatsisissatut siunnersuutiminni imigassamik nioqquteqarnerup arfininngornikkut nalunaaqutaq qulingiluanit ataatsimut ammasarfiata aqqanerniit pingasut tungaanut allanngortinneqarnissaa kissaatigaat.
Ataatsimiititaliamili amerlanerussuteqartut isumaqarput nunaqarfinni imigassaq akuersissutaatillit qinnuteqarnerisigut arfininngornermi nalunaaqutaq qulinit ataatsimut imigassanik tuniniaanissamut akuersissummik tunineqarsinnaasariaqartut, tamannalu inatsisissatut siunnersuummut ilanngunneqassasoq Naalakkersuisunut kajumissaarutigaat.
AAMMA ATUARUK Imigassaq aalakoornartortalik immuttut inngilaq
Illuatungaanilu Demokraatit isumaqarput imigassamik nioqquteqarmut ammasarfiit nalinginnaasumik sivitsorneqassasut, taamaaliornikkut arfininngornikkut ammasarfinnut killeqartunut atatillugu siuleriiaattoqaranilu uivertoqartannginnissaa siunertaralugu.
Assiaqusersuinissaq isumaqataaffigaat
Siunnersuummi paragraf 28, imigassat pisiniarfinni qanoq assiaqusersorneqarnissaannut tunngasoq, inuiaqatigiinni oqallisaangaatsiarpoq. Pisiniarfiillu immikkoortortaqarfiit imigassaarniarfiusut assiaqusersorlugit sapaatit akunneranni uani akerliussutsimik takutsitsipput. Ataatsimiititaliaq isumaliutissiissutimini allappoq tamanna suliaqarnermini aamma sammingaatsiarsimallugu.
Ataatsimiititaliami ikinnerussuteqartut Demokraatit, isumaqarput inatsisissatut siunnersuummi tamatumunnga tunngasoq piivissorneqartariaqartoq, Inuit Ataqatigiilliu Siumullu qulanngillat. Siunnersuut tapersersorpaat isumaqarlutilli 'najukkami' pissutsit inatsisiliornermi eqqumaffigineqartariaqartut.
Ussassaarisoqassava imaluunniit taamaaliortoqassanngila?
Immikkoortoq alla oqallinnermi inituupilussuaq tassaavoq imigassat ussassaarutigineqartarnerat. Pisiniarfinni imigassaarniarfiit assiaqusersorneqarsimasut avataasigut imigassanik neqerooruteqarnermi ussassaaruteqarnissaq Naalakkersuisut inerteqqutaalersinniarpaat.
Inatsisartut ilaqutariinnermut peqqissutsimullu ataatsimiititaliaanni amerlanerussuteqartut eqqarsaataasoq taperserpaat, naak nunatsinni innuttaasut Danmarkimi nunanilu tamalaani taamatut inatsiseqarfiunngitsuni tusagassiuutinit ussassaarutinik sunnerneqartaraluartut. Isumaliutigineqartunulli tamanna ilaasimasoq, ataatsimiititaliaq taama allappoq.
AAMMA ATUARUK Pisiniarfissuit imigassaq pillugu inatsisissamut akerliussutsimik takutitsiniartut
Amerlanerussuteqartulli imigassamik nioqqutissiorfinnut assigisaannullu aningaasaliillutik tapersersuisunut tunngatillugu ussassaarisoqarsinnaaneranut periarfissamik ammatitsinissaannik naalakkersuisut kajumissaarpaat.
Ataatsimiititaliamilu ikinnerussuteqartut Demokraatit isumaqarput tamanit orninneqarsinnaasuni imigassanik tuniniaanermi atornerluinermik imigassanillu aalakoornartulinnik ingasaassinngitsumik nunatsinni ussassaarutinik suliaqartartut ussassaarusiorsinnaasariaqartut.
Imigassaq pillugu inatsit sapaatit akunnerata tulliani akuersissutigineqassappat, malittarisassat nutaat aappaagu marsip aallaqqaataanit atuutilissapput.
