Imerniartarfinni nakkutilliiartortut: Inuit 20-nit amerlanerusut uppernarsaaqquneqartut

Politiit Nuummi imerniartarfinni coronamut malittarisassat nutaat eqquutsinneqarnersut pillugu unnuaq nakkutilliiartorput.

Pingaartumik Nuummi nakkutilliisoqarpoq, politiillu illoqarfimmi imerniartarfinnut arlalinnut unnuaq nakkutilliiartorput.

Tassani inuit 20-nit amerlanerusut tamakkiisumik akiuussuserneqarsimanermut coronavirusimulluunniit tunillatsissimannginnermut uppernarsaaqquneqarput.

Kalaallit Nunaata Politiivineersoq Nuno Larsen taama paasissutissiivoq.

- Tamarmik uppernarsaateqarput, politiineersoq KNR-imut oqarpoq.

AAMMA ATUARUK Politiit akiuussutissamik kapitissimanersutit paasiniarlugu unnuap-qeqqanit misilittaaffigissavaatsit

Coronavirusi pillugu malittarisassat nutaat nunatta annerpaani arfininngormat atuutilerput.

Nunatsinni innuttaasut, Aasianni, Upernavimmi Upernaviullu pigisaani nunaqarfinni innuttaasut minillugit, katersugaasivimmukarniarunik, imerniartarfimmukarniarunik neriniartarfimmukarniarunilluunniit tamakkiisumik akiuussuserneqarsimanermut imaluunniit tunillatsissimannginnermut uppernarsaasinnaasussaapput.

Malittarisassallu atuutileqqammeraluartut, innuttaasut politiinit naapinneqartut uppernarsaammik takutitsinissaminnut piareersimasimapput.

- Ilaasa coronapasi takutippaat, ilaasalu pappiaraq aappassaanik akiuussuserneqarnermi tunniuneeqartoq takutippaat, Nuno Larsen oqarpoq.