Imikoorummik misissuineq coronamik siaruatsaaliinermut ilanngunneqangajalertoq

Danmarkimi coronavirusip tunillanneqarsimasunik nutaamik tassa imikoorummik misissuinikkut ujaaseriaaseqalissaaq.

Danmarkimi oqartussat, tassa naalagaaffiup nappaatinut akiuussutissaliorfia, Statens Serum Institut (SSI), kommunillu nappaatit tunillaassortut akiorniarlugit imikoorummik juulip aallaqqaataani atuutilersumik misissuisinnaanissaannut inatsisissatut siunnersuut, Folketingimi amerlanerussuteqartut ullumi sisamanngornermi akueraat.

Tassa nappaalaneq pillugu inatsit allanngortippaat.

Imikoorummik misissuineq nunani allarpaalunni atuutilereernikuuvoq.

Inuit ataasiakkaat coronavirusimik tunillanneqarsimanermut ersiuteqalinnginneranni ilumut tunillanneqarsimanersut imikoorummik misissuinikkut paasineqarsinnaavoq. Tassa Danmarkip ilaani aalajangersimasumi tuniluuttoqarataannaaneranik periuseq taanna atorlugu siulittuisoqarsinnaavoq.

AAMMA ATUARUK Danmarkimi coronamik tunillatsissimasut nutaat 155-iusut

Periuserli taanna inunnik misissueriaaseq nalinginnaasutulli tutsuiginartiginngilaq.

Tassa imaappoq, kikkorpiaat coronamik tunillanneqarsimanersut imermik errortuutikumik misissuinikkut paasineqarsinnaanngilaq. Tuluit Nunaanni Sverigemilu imermik errortuutikumik misissuisoqartalereernikuuvoq.

Danmarkimi sumiiffinni arlalinni, soorlu Bornholmimi, imermik errortuutikumik qaammatini kingullerni misileraalluni misissuisoqartareerpoq.

Bornholmimimi killilersuinerit Danmarkimi sumiiffinni allani killilersuinernit qasukkaamineqajaarnerupput. Illoqarfiit pingaarnersaata eqqaani aamma misissuisoqarpoq.

SSI naapertorlugu imikoorummi tunillannartoqarnera innuttaasullu coronamik tunillatsissimasutut paasineqartarnerisa akornanni ataqatigiittoqartoq Bornholmimi ukioq manna siusinnerusukkut misissuinerit takutippaat.

Danmarkimi tunillatsittut amerlassusaasa qaammatini qaffasinnerpaaffigisaanni Ishøj Kommunip tunillatsittartut ikiliserujussuarpai. Tamanna imikoorutip coronavirusimut misissorneqarneratigut pivoq. Ishøjimi borgmesteri, Ole Bjørstorp qaammammi siusinnerusukkut taama oqarpoq.

Taassuma kommunip imikoorummik sapaatip akunneranut marloriarluni pingasoriarluniluunniit misissuisalernera innersuussutigaa.

AAMMA ATUARUK Tamaat isigalugu: Coronavirus pillugu killiffik

- Misissuisoqartalernera allannguisitsivoq, borgmesteri oqarpoq.

Inatsisip atuutilerneratigut kommunit taakkuninnga suliaqartunik avataanit suleqateqarnikkut sumiiffimmi imikoorummik nakkutiginninnissamut suliniuteqarsinnaalerput. Suliaqartut avataaneersut tassaasinnaapput imikoorummik pilersuinermik suliffeqarfiit.

Ole Bjørstorpip oqarnera naapertorlugu Ishøj Kommunip assersuutigalugu imikoorummik nakkutiginninneq coronavirusimut akiuiniarnerminuy ataavartumik aasaanerata kingorna ilaalernissaa aalajangerpaa.

Folketingimi partiit Socialdemokratiit, Venstre, Dansk Folkepartii, SF, De Radikale, Enhedslisten, De Konservative aamma Liberal Alliance inatsimmik akuersisuupput. Partii Nye Borgerlige akuersinanilu akerliunngilaq.