Imarsiornermik Ilinniarfiup nuunneqarnissaanut atatillugu akerliussutsimik takutitsisoqalerpoq
Siumup illoqarfimmi immikkoortortaqarfia nuussinissamut akerliussutsimik takutitsinermik aaqqissuisuuvoq. Imarsiornermik Ilinniarfiup Paamiuni inerisaaviginagu nuunneqarniarnera Paamiormiut paasiuminaatsippaat. Akerliussutsimik takutitsineq nal. 13.00 Brugsenimit Piareersarfimmiillu aallartissaaq.
- Annertunerusumik naatsorsuuteqanngilagut, ilinniarfiummi nuunneqarnissaa Naalakkersuisunit aalajangerneqareerpoq. Paarlattuanilli akerliussutsimik takutitsinikkut innuttaasuusugut naammagittaaliornitsinnik takutitsinissatsinnut periarfissatsialaavoq, Johan Barlaj Sermitsiaq.AG-mut oqarpoq.
Paamiuni Siumup immikkoortortaqarfia partiip immikkoortortaqarfiinit allanit tapersersorneqarluarpoq. Siumup Qaqortumi immikkoortortaqarfiani siulittaasup aaqqissuussineq tapersersorpaa naalakkersuisooqatigiillu sakkortuumik isornartorsiorlugit.
- Siumup Paamiuni immikkoortortaqarfiata aaqqissuussinera pitsaalluinnarpoq. Nukillalaajummeqqanerat paasilluarsinnaavarput. Kommunit kattussuunneqarnissaat aalajangerneqarmat Namminersorlutik Oqartussat ilinniarfeqarfiisa illoqarfinnut assigiinngitsunut inissinneqarnissaat siunertarineqarsimagaluarpoq, taamaaliornikkut sumiiffinni tamani ineriartornissaq angujumallugu. Naalakkersuisooqatigiilli issiasut nalaanni tamanna ajoraluartumik pinngitsoorsimavoq, Qaqortumi Siumup immikkoortortaqarfiani siulittaasoq Ole Mølgaard-Motzfeldt naqissusiivoq.
