Ilulissani nakorsaq: Coronavirusip tunillaassuunnissaanut ima piareeqqavugut

- Coronavirus tunillaassuutilissagaluarpat piareersimaffissat assigiinngitsut ilisimaarinissaat pikkoriffigisariaqarparput, Peqqinnissaqarfiup Ilulissani immikkoortuani nakorsat pisortaat Peter Vedsted oqarpoq.

Ilulissani tunillatsissimasoq ataaseq paasineqarpoq, taannali peqqissereerpoq.

AAMMA ATUARUK Coronamik tunillatsissimasut marluk peqqissisut: Nunatsinni viruseqartoqanngilaq

Coronavirusilu tunillaassuutilissappat napparsimmavimmi piareersimaneq assigiinngitsunut pingasunut immikkoortiterneqarpoq:

- Ullumikkutut inissisimatilluta sillimaniarnerput minnerpaaffissaminiippoq. Inuit isertussat isumaqatigiiuteqareernissaat qulakkeertarparput, napparsimmavimmummi isertussat coronaviruseqaratarsinnaammata sillimaniarpugut. Amerlasuunik pulaartoqaqqusaanngilaq - ernisuttumullu inuk ataasiinnaq najuussinnavoq.

Sukatereqinneq

- Tunillaassuisoqalissappat sukatereqqissaagut. Napparsimavimmullu unittoqassappat mattussiviusinnaasut piareeqqareerput, tassa tunillaassuisoqalissappat assigiinngitsutigut piareersimavugut. Peter Vedsted oqarpoq.

Ilulissani coronavirusimut misissortikkiartortartut ullormiit ullormut nikerarput.

Tunillatsissimagaannilu angerlarsimaannarnissaq siullermik piumasaqaatigineqassasoq, nakorsaq nassuiaavoq. Napparsimmavimmut unititsinissaq tamatumani pisariaqanngilaq.

Ersiutilli amerlissappata, soorlu anersaartorniarneq ajornakusuulissappat, napparsimmavimmut unititsisoqassaaq.

- Tassani init mattusimatitsiviit atorneqassapput. Sulisullu illersuutinik atiseriarlutik ineeqqamut isertassapput.

Piareersimanerup immikkortuani appasinnermi init mattusimatitsiviit atorneqarnissaminnut piareersimasut marluupput.

Immikkoortortaq ataaseq matuneqassaaq

Tunillaassuisoqangaatsialissappallu, inuit amerlasuut napparsimavimmut unittariaqalerlutik, taava napparsimavimmi immikkoortortap ataatsip matuneqarnissaa piareersimaffigineqarpoq.

- Tassaniissapput coronavirusimik tunillatsissimasut, tunillatsissimanngitsullu allami immikkoortortami uninngasinnaassallutik.

Ilulissani napparsimmavik anersaartuuteqanngimmat uninngasut taassuminnga pisariaqartitsisut Nuummukaanneqartassasut, Peter Vedsted oqarpoq.

Napparsimmavimmi nakorsat arfiniliupput peqqissaasullu aqqaniliullutik.

- Taamaattumik tunillatsissimasut sapinngisamik napparsimmavimmiinnginnissaat pisariaqarpoq. Uagummi sulisut tunillatsinnginniassagatta. Tamanna pingaaruteqarluinnarpoq, uaguinnaavugummi. Sianigissaagut.

Nunatta Nakorsaaneqarfiata ippassamut saqqummiussai naapertorlugit Avannaata Kommuniani coronavirusimut misissortissimasut 184-upput.