Ilulissani angerlarsimaffeqanngitsut unnuisarfissaat ullumi ammarpoq
Avannaata Kommuniata Ilulissani angerlarsimaffeqanngitsut unnuisarfissaat nutaaq ullumi ammarpaa.
Containerit arfinillit sanaqqinneqartut pineqarput. Containerit qalialersorneqarput qisunnillu iigartalersorneqarlutik.
Angerlarsimaffeqanngitsunut containerinik unnuisarfiliaq sisamanik initaqarpoq, marlunnik uffarfeqarpoq ataatsimoortumillu ineqarlunilu igaffeqarluni.
Tassani arfineq-pingasut ineeqqani marlunni sinittarfiusuni unnuisinnaapput.
AAMMA ATUARUK Avannaata Kommuniani isumanninnermik suliaqartut akissarsiaat 100.000 koruunit angullugit aaqqiivigineqartut
Kommunalbestyrelsip angerlarsimaffeqanngitsut unnuisarfissaanut malittarisassat nutaat – ilaatigut angerlarsimaffeqanngitsut kommunimi isumaginninnermik suliaqartumik angerlarsimaffeqanngitsut ”ikiortigisinnaasaannik inuunerissaarnerulernissamullu tapersersortigisinnaasaannik” oqaloqateqarnissamik periarfissaqartitsisoq aamma akueraat.
- Innuttaasup sapinngisamik imminut ikiorsinnaalernissaanut aallarnisaataasumik ikorfartuinissaq, kaammattuinissaq isumassuinissarlu siunertaavoq. Malitsigisaanik ikiorneqarneratigut innuttaasoq namminerisaminik ineqalernissaanut siunertaqartumik ikiuinissaq ikorfartuinissarlu siunertaapput.
Ullaakkorsiutit unnukkorsiutillu akeqanngitsut
Isumaginninnermik suliaqartoq angerlarsimaffeqanngitsoq peqatigalugu iliuusissatut pilersaarusiortassaaq.
Angerlarsimaffeqanngitsut unnuisarfiat nutaaq sapaatip-akunneranut ullut tamarmik ammasassaaq, taannali ullut tamaasa ullaakkut qulingiluaniit ullaakkut aqqanermut matoqqasassalluni. Piffissamimi tassani eqqiaasoqartassaaq.
AAMMA ATUARUK Avannaata Kommunia coronap nalaani: Aningaasarsiornikkut annerusumik suli maluginngilarput
Angerlarsimaffeqanngitsut unnuisarfianni ullaakkorsiutit unnukkorsiutillu akeqanngitsumik sassaalliutigineqartassasut, kommuni allappoq.
Kommunip oqarnera naapertorlugu angerlarsimaffeqanngitsut unnuisarfiat novembarip ulluisa 15-ianni ammartussaagaluarpoq, sanaartorneratali kinguaattoornera pissutigalugu ammarnissaa kinguartinneqarluni.
Angerlarsimaffeqanngitsunut containerinik unnuisarfiliorneq kommunip 1,2 millionit koruuninik aningaasartuutigaa – taanalu ima isikkoqarpoq:
