Avannaata Kommuniani isumanninnermik suliaqartut akissarsiaat 100.000 koruunit angullugit aaqqiivigineqartut

Isumannittut SIK-mi isumaqatigiissut malillugu akissarsiaqartinneqarsimagaluarput, taakkuli Isumaginninnermik Siunnersuisartut Isumaginnittullu akissarsiaat pillugit isumaqatigiissut eqqortoq malillugu maanna akissarsiaqartinneqalerput.
Atorfillit Kattuffiata nunanitsinni kommunini isumaginnittut allat akissarsiaminnik aamma aaqqiivigineqartariaqarnersut maanna misissornialerpaa. Assi © : KNR
januaarip 15-at 2020 13:05

Avannaata Kommunia aamma atorfillit kattuffiat isumaginnittoqarfimmi sullissisut akissarsiaat pillugit isumaqatigiissuteqarmata sullissisut SIK malillugu akissarisaqarunnaarput, tamannalu Avannaata Kommunianit AK-miillu nuannaarutigineqarpoq.

- Sullissisut isumaginninnermi siunnersortit sullissisullu isumaqatigiissutaannut nuunneqarput, sullissisullu ilaat akileraarut peereerlugu 100.000 koruunit angullugit pissarsillutik, taamaalillutik akissarsiat iluarsiissutaat qaammamut 6-7.000 koruunit missaanni naleqarput. AK-p siulittaasua tusagassiutinut taama nalunaaruteqarpoq.

Assi © : Atorfillit Kattuffiat / Dina Olsen

Foto: Fagforeningen Atorfillit Kattuffiats formand, Dina Olsen. 

 

- Soorunami nuannaartorujussuuvunga taamatut akissarsiaat eqqortumik inissinneqarmata taakkununnga aamma soorunami pitsaassaqaaq, suliarisartagaat aamma imaannaannginnerat eqqarsaatigalugu. Atofillit Kattuffianni siulittaasoq, Dina Olsen oqarpoq.

Avannaata Kommuniani borgmesterip, Palle Jerimiassenip akissarsiat kingumoortumik aaqqiiffigineqarneri aamma nuannaarutigaa:

- Kattuffiit aqqutigalugit aammalumi suliaminnut aallaavigalugu akissarsiaqarnissaannut tamatta soqutigivarput, aamma nuannaarutigivara massakkut taamatut AK aqqutigalugu sulisut taamatut aaqqiivigineqarmata, borgmesteri oqarpoq.

Ilinniagartik aallaavigalugu akissarsiaqarsimasut

 Avannaata Kommuniani sullissisut SIK malillugu 2015-imili akissarsiaqarsimapput.

- Ilinniassusertik malillugu allaffimmiutut imaluunniit niuernermik ilinniarsimanertik aallaavigalugu akissarsiaqarsimapput, taavalu aatsaat AK-p isumaqatigiissuteqarnerata kingorna sagsbehandleritut aaqqiivigineqarlutik, Palle Jerimiassen oqarpoq.

Kingumoortumilli aaqqiissuteqarneq kommunimut qanoq naleqassanersoq bormesterip maanna oqaatigisinnaannginnerarpaa.

- Tassami ukua massakkut aaqqiivigiinerupput, suliaat malillugu isumaqatigiissutit malillugit aaqqiivigiinerullutik, aamma pisussaaffigivarput pisortatut suliffeqarfiugutta isumaqatigiissutit malillugit sulissalluta, aamma taanna siunissami taama ingerlassaaq, borgmesteri oqarpoq.

Isumaginnittoqarfimmi sullissisut eqqortumik akissarsiaqarnissaat pillugu sulineq uninnavianngikkallarpoq. Kommunimimi sullissisut akissaataat AK-p ataavartumik misissuiffiginiarpai.

- Neriulluta aamma taamatut sulisut AK-llu isumaqatigiissutaanik atuinngitsut ilaasortagut taamatut saaffiginnissinnaaqqullugit aamma, taamaalillugit aamma eqqortumik akissaasersorneqarnissaat isumaqatigiissummilu eqqortumik inissinneqarnissaat suliariniassagatsigu, AK-mi siulittaasoq, Dina Olsen taama oqarpoq.

Kommunit allat misissorneqassasut

- Kommunit sullisisunik SIK malillugu akissarsiaqartitsisarnerat ajoraluartumik takornartaanngilaq. Taamaattoqarneranut patsisaasoraarput; sulisitsisumut akikinnerusoq ajortorneqartarnera, Taamaammat kommunini sullissisutut atorfillit SIK malillugu akissarsiallit AK-mut saaffiginninnissaminnut tikilluaqqusaapput, Dina Olsen oqarpoq.

Atorfillit Kattuffiata nunanitsinni kommunini isumaginnittut allat akissarsiaminnik aamma aaqqiivigineqartariaqarnersut maanna misissornialerpaa.

- Sullissisut eqqunngitsumik isumaqatigiissummik tunngaveqarluni atorfeqartissallugit pissusissamisuunngilaq. Taamaattoqartillugumi sullissisut ilaatigut ikiorniakkamisullu aningaasaqarnikkut ilungersortigisarput, Atorfillit Kattuffianni siulittaasoq, Dina Olsen oqarpoq.