- Annertunerusumik kommunitut aningaasarsiornikkut maluginngilarput, aalisarneq sanaartornerlu annertuumik ingerlammata, Avannaata Kommuniani borgmesteri Palle Jerimiassen oqarpoq.Assi: KNR

Avannaata Kommunia coronap nalaani: Aningaasarsiornikkut annerusumik suli maluginngilarput

Avannaata Kommuniani aalisarluarmata sanaartorluarmatalu coronavirus aningaasatigut annerusumik annaasaqaataasimanngitsoq, borgmesteri oqarpoq.

Coronavirus Ilulissani takornariaqarnermut ajornartorsiortitsingaatsiarpoq.

Taamaakkaluartoq Avannaata Kommuniani aningaasaqarnikkut nappaat annerusumik ajornartorsiortitsinngitsoq, borgmester Palle Jerimiassen (S) oqarpoq.

- Annertunerusumik kommunitut aningaasarsiornikkut maluginngilarput, aalisarneq sanaartornerlu annertuumik ingerlammata, Avannaata Kommuniani borgmesteri Palle Jerimiassen oqarpoq.

Taanna sinerissap qanittuani aalisartut peqatigiiffiata SQAPK-p taperserpaa. Taakkumi oqarput coronavirusertoqarnerani aalisarneq annerusumik sunnerneqarsimanngitsoq.

Aamma Ilulissat Isfjordcenter, inissiat akunnittarfillu sananeqarmata Ilulissani sanaartorneq ingerlalluarpoq.

Soraarsitaasut sillimaffigineqartut

Coronavirusip nunatsinnut marsimi takkunneraniit Avannaata Kommuuniani sillimaniarneq pillugu ulappupput.

Ilulissallu takornariaqarfissuummat coronavirusi peqqutigalugu soraarsitaasut sillimaffiginiarneqarsimapput:

- Corona takkummat taamanikkut naatsorsuinikuuvugut ajornerpaamik inissittoqassappat, tassa

suliffissaaleqineq annertuumik qaffariataassagaluarpat, qanoq aningaasatigut kinguneqarsinnaanera naatsorsornikuuarput.

- Taamani 10 millionit missaannik naatsorsuutiginikuuarput inuit 150-it suliffissaaleqilissagaluarpata, Palle Jerimiassen oqarpoq.

Taanna naapertorlugu coronavirusimik peqquteqartumik suliffissarsiortut 33-nik amerlisimagaluarput.

- Coronamut tunngativillugu soraarsitaasut imaluunniit angerlartitaasut tamarmik immikkut allattorneqassasut, tassani 30-it sinnilaarlugit paasinikuuagut angerlartitaasimasut. Taakkualu qujanartumik kingunitsianngua suliffeqarfinni allani sulilernikuupput.

Takornariaqarnermut eqquisoq

Naak kommuni aningaasatigut malussanngikkaluartoq takornariaqarneq ajornartorsiorpoq.

- Suliffeqarfiit kommunitsinniittut takornariaqarnermik ingerlatsisut, hotelit, neriniartarfiit, angallassisartut, sanaluttartut taakkua annertoorujussuarmik malugivaat.

AAMMA ATUARUK Ilulissani sanaluttartut takornariartitsisartullu coronap nalaani: Pikkunarpoq

Ilulissat 4.600-jut missaannik innuttaqarpoq. Takornariallu ukiumut 20.000-it missaaniitut illoqarfimmukartartut, kommunip kisitsisaataasa takutippaat.

Kommunip takornarialerisunit akileraarutitigut isertittagaat coronavirusip takkunneraniit unipput.

Avannaata Kommuuniani akileraarutitigut 2020-mi isertitat ukiut marluk aatsaat qaangiuppata aningaasaqarnikkut malugineqarumaartut borgmesteri nassuiaavoq.

- Soorlu ukioq manna hotelit assigiinngitsutigut isertitamikkut annaasaqarsimappata taavalu skateerutissaat minneruppat aatsaat ukiut marluk qaangiuppata malugisussaagatsigit. Taamaattumik ukioq manna isertitassagut nikinnikuunngillat. Aatsaat ukiut marluk qaangiuppata malugissuagut.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7797
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 25-at 2020 nal. 10:45