Ilulissani akunnittarfiit coronavirusip ajornartorsiortitsineranit eqqugaasut

Nunatsinni illoqarfik takornariarfigineqarnerpaasartoq Ilulissat coronavirusip tuniluutsinnaveersaarnerani annertuumik eqqugaavoq.

- Isertornianngilanga, tassami ingerlalluarpallaanngilagut, Ilulissani Hotel Icefiordimi pisortaq Anders Gadeberg oqarpoq.

- Sapaatit akunnerini ukunani akunnittarfik ulikkaaqqasussaagaluarpoq. Massakkulli inoqanngingajappoq. Kaaviiartitatsinnit 4-5 millionit annaareerpagut, Anders Gadeberg oqarpoq.

Hotelimi allami aamma ingerlalluartoqarpallaanngilaq.

Ineeqqat inoqanngillat

Hotel Arcticip ineerai poorskikkunni ulikkaaqqasussaagaluarput. Akunnittarfiulli nunarsuami tusaamasaasup ilua ullumikkut inoqanngilluinnarpoq.

- Inniminniinerit 5.000-it annaavagut, Hotel Arcticimi pisortaq Morten Nielsen oqarpoq.

- Kaaviiaartitatta ilarujussuat annaavarput. Kaaviaartitassaraluatta 25 procentiat annaagigut naatsorsuutigisinnaavara. Koruuninngoqqissaarlugu nalileruminaappoq, kisianni millioninik arlalinnik annaasaqarpugut.

Nunatsinni akunnittarfinni ukioq kingulleq aatsaat taamak unnuisoqartigaaq massakkullu takornarianik takusassaqanngilagut.

Nualluut coronavirus peqqutaalluni Hotel Arctimi Hotel Icefiordimilu sulisunik angerlartitsiinnartoqariaqarsimavoq.

Nunatsinni akunnittarfiit neriniartarfiillu annertuumik eqqugaasut ilaatigullu soraarsitsisariaqarnerit pisut Sulisitsisut Kattuffiani pisortap oqaatigaa:

- Soraarsitsisoqarnikuuvoq, kisianni annertunerusumik massakkut oqaaseqarfigisinnaanngilakka, kisitsisit kommuunimiit tunniunneqartussat utaqqigatsigit, Brian Buus Pedersen oqarpoq.

Soraarsitsinerit pisarput

Naalakkersuisut suliffeqarfinnut corona peqqutigalugu ajornartoortunut ikiorsiissutigisaannut ilaavoq, sulisut aningaasarsiassaraluisa 75 procentiisa oqartussaaniit akilerneqarnissaat. Suliffeqarfiilli ilai sulisuminnut 25 procentimik akissariaqartitsinissaminniut akissaqanngillat:

AAMMA ATUARUK Sulisut ikiorsiissutinik annaanneqartut

- Soraarsitsinerit pisarput sulisitsisup aningaasat kaaviiaartitassani piffissap aalajangersimasup iluani uteqqinnavianngitsut takusinnaaguniuk. Suliffeqarfiit ilaasa sulisoqaannarnissartik akissaaruttarpaat, naak sulisut aningaasarsiaasa ilaat oqartussaniit akilerneqartussaagaluartut, Brian Buus Pedersen oqarpoq.

Suliassaqanngikkallarnerlu akunnittarfinni atorluarneqarpoq. Sulisummi angerlartitaagallarsimanngitsut akunnittarfiup iluani assigiinngitsunik nutarteripput:

Nutarterinerit assigiinngitsut

- Massakkut piffissaq atorluarlugu akunnittarfik nutarterparput. Ineeqqat 30-t nutarterparput, neriniartarfiutitsinnillu nerisassat allattorsimaffii ammaqqinnissatsinnut nutarterneqaleruttorput. Uninngaannanngilagut, Morten Nielsen oqarpoq.

AAMMA ATUARUK Tamaat isigalugu: Coronavirus pillugu killiffik

Hotel Icefiordimittaaq nutarterisoqarpoq:

- Nutarterivugut. Ineeqqat nutaat 16-it suliarivagut. Ineeqqat skyview windowweqassapput, tassa siniffiup qulaani igalaaqassapput. Taamaalillutik pulaartut siniffimmiit arsarnerit isigisinnaaniassammatigit. Aneerasaartarfiit aamma suliarivagut, Anders Gadeberg oqarpoq.