Innaarsuit: Iluliarsuup qanittuani najugallit nuutsinneqarallartut
Innaarsuit inuerutitinneqartoq Danskit nutaarsiassaqartitsiviisa Ritzaup DR.dk-llu allaaseraat. Tamannali ilumuunngitsoq Politiini pingaartut pisortaat Lina Davidsen oqarpoq.
- Nunaqarfik inuerutinneqanngilaq. Najugaqartulli iluliarsuup aserorneranit eqqungaasinnaasut nunaqarfimminiiginnarlutik illumut allamut nuutsinneqarallarput, sulili Innaarsunniipput, taanna oqarpoq.
AAMMA ATUARUK Innaarsuit eqqaanni pisoq qanimut malinnaaffigaarput
Innuttaasut iluliarujussuaq nunaqarfiup eqqannguani aarlerinartumik inississimasoq ulluni kingullerni qanimut malinnaaffigaat. Avannaata Kommunianilu upalungaarsimasut, Namminersorlutik Oqartussat Politiillu pisumut malinnaallutik paasissutissiissutigereerpaat. Nunaqarfimmullu qaninnerit najugaqarfiit Innaarsunni iluliarsuaq aseroriasaassagaluarpat piareersimassasut nalunaarfigineqarnikuullutik.
SAR-ip qulimiguua tassa S61 Innaarsunnut qaninnerutikkumallugu Kangerlussuarmit Ilulissiaanneqarsimasoq, upalungaarsimanermullu iluliarsuaq aserussangaluarpat pilersaarusiortoqareersimasoq politiit aamma paasissutissiissutigaat.
AAMMA ATUARUK Innaarsunni iluliap malissuaartitsisinnaanera ernumanartoq
Innaarsuit eqqaani iluliarujussuaq unnuup ingerlanerani susimanngitsoq Lina Davidsenip oqaatigaa.
Ilulissap ilarsua nakkarluni Innaarsuit eqqannguani mallertitsinerani video Oline Nielsenip nunaqarfimmeersup siaruarterpaa.