VIDEO: Innaarsunni iluliap malissuaartitsisinnaanera ernumanartoq

Nunatta avannaani nunaqarfimmi innuttaasut iluliarujussuaq nunaqarfiup eqqannguani aarlerinartumik inississimasoq ulluni kingullerni qanimut takusinnaavaat. Assikkut takullugu kusanaraluaqaluni eqqissisimanaqaaq, Inaarsunnili innuttaasunut iluliaq navianarlunilu ernumanarpoq.

Nunaqarfiup aqutsisuisa siulittaasuat, Karl Petersen naapertorlugu nunaqarfimmiut ilulissap aserorluni malissuaartitsinissaa annilaangagaat.

- Iluliaq aserussagaluaruni piniarfimmut, innaallagissiorfimmut illunullu allanut immap avataaniittunut utoqqaat najugaqarfigisaannut navianassaaq, Karl Petersen KNR-imut oqarpoq.

Avannaata Kommuniani upalungaarsimanermut pisortaagallartup, Bjarne Markussenip pissutsit nakkutigeqqissaarneqartut ilisimatitsissutigaa.

- Nunaqarfinni qanittuni upalungaarsimasut piareersimaqquneqarput, Bjarne Markussen oqarpoq.

Tamatuma saniatigut Upernavimmi upalungaarsimasut pisortaat, Ilulissanilu ingerlatsivinni pisortat pisut malinnaaffigeqqissaarpaat.

Nunaqarfimmi illut sorliit aarlerinarnerusumiinnerusut misissorneqarsimasut, Bjarne Markussenip ilisimatitsissutigaa.

- Immamut qanittumi najugaqartut nunaqarfimmi qutsinnerusumiittuni nalunngisaminni sinittarsinnaagunik taamaalioqquagut, Bjarne Markussen oqarpoq.

Upernaviup qanittuani sisamanngornermi siallissasoq ilimasaarutigineqarpoq, tamannalu pissutsinut ajornerulersitsisinnaavoq.

- Isornarnerulissaaq. Siallersuaanerata ilulissap aserornissaa aarlerinarnerutilersinnaavaa, Bjarne Markussen oqarpoq.

Ilulissap ilarsua nakkarluni Innaarsuit eqqannguani mallertitsinerani video Oline Nielsenip nunaqarfimmeersup siaruarterpaa.